Yevropa komissiyasi prezidenti Ursula fon der Lyayen bu hafta Rossiyaning Ukrainaga qarshi urushini to‘xtatish uchun “hal qiluvchi” bo‘lishini aytdi.
Siyosatchi 18-may kuni AQSH vitse-prezidenti Jey Di Vens bilan Rimdagi muzokaralar chog‘ida shunday fikr bildirdi.
Bizni birlashtiradigan narsa shundaki, biz Ukraina uchun adolatli va mustahkam tinchlikni xohlaymiz. Siz (AQSH) urushni to‘xtatishga qanchalik sodiq ekanini bilamiz va buning uchun sizga minnatdorlik bildiraman. Hozir, albatta, oldinga siljishimiz muhim va o‘ylaymanki, keyingi hafta (shu hafta nazarda tutilmoqda) bu borada hal qiluvchi ahamiyatga ega bo‘ladi.
Yevropaning a’zo davlatlari mudofaaga sarmoya kiritishni kuchaytirish kerakligini bilishadi. Aynan shuning uchun Komissiya sifatida biz kelgusi to‘rt yil ichida mudofaa investitsiyalari uchun 800 milliard yevrogacha mablag‘dan foydalanishga ruxsat berdik. Bu, albatta, Yevropa Ittifoqini mustahkamlaydi, kuchli Yevropa har doim kuchli NATOni anglatadi, dedi Lyayen.
Vens esa Yevropa Ittifoqi “savdo kabi masalalar bo‘yicha ba’zi kelishmovchiliklarga qaramay”, AQSHning muhim ittifoqchisi ekanini ta’kidladi.
Lekin bizda birgalikda ishlashimiz kerak bo‘lgan ko‘plab kelishuvlar va masalalar ham bor, dedi AQSH vitse-prezidenti.
AQSH prezidenti Donald Tramp 19-may kuni Rossiya rahbari Vladimir Putin va Ukraina prezidenti Vladimir Zelenskiyga qo‘ng‘iroq qilishi kutilmoqda. U Putin bilan urushni to‘xtatish va savdoni muhokama qilishini aytgan. Rossiya va Ukrainaning to‘g‘ridan-to‘g‘ri muzokaralari 16-may kuni bo‘lib o‘tgandi, garchi dastlab 15-mayga rejalashtirilgan bo‘lsa-da. Ularni qayta tiklash tashabbusi bilan Putin chiqqan.
Rossiya prezidentining bu uchrashuvda ishtirok etishi Kremlda istisno qilingan. Zelenskiy 15-may kuni Anqaraga uchib kelgan, Turkiya yetakchisi Rajab Toyyib Erdo‘g‘on bilan muzokaralar o‘tkazdi va Ukraina delegatsiyasini Istanbulga yubordi.
Uning o‘zi Albaniyaga uchib ketdi va u yerda Fransiya prezidenti Emmanuel Makron, Buyuk Britaniya va Polsha bosh vazirlari Kir Starmer va Donald Tusk, shuningdek, Germaniya kansleri Fridrix Mers bilan uchrashdi. Yevropa yetakchilari ham Trampga qo‘ng‘iroq qilishdi. Starmerning aniqlik kiritishicha, suhbatdan maqsad Rossiya “yana bir bor” namoyish etgan “qabul qilib bo‘lmaydigan pozitsiya”ga birgalikda javob berish edi.
Izoh (0)