Qirg‘iziston O‘zbekistondan eksport qilingan 3,5 tonna pistani qaytarib yubordi. Bu haqda 24.kg xabar berdi.
Kimyolashtirish, o‘simliklarni himoya qilish va karantin boshqarmasi 11-avgust kuni “Do‘stlik” nazorat-o‘tkazish punktida nazorat tadbirlari o‘tkazgan. Tekshiruv davomida Qirg‘izistonga karantin fitosanitariya talablarini buzgan holda 3,5 tonna pista olib kirilgani aniqlangan. Xususan, mahsulotlar qadog‘ida majburiy markirovka bo‘lmagani sababli yuk O‘zbekistonga qaytarib yuborilgan.
Har kuni O‘zbekiston fuqarolari tomonidan tashilayotgan qo‘l yuklarining o‘simliklar karantini sohasidagi qonunchilik talablariga nomuvofiqligi bilan bog‘liq o‘rtacha besh-olti holat qayd etilmoqda, deyiladi xabarda.
2025-yilning iyul—avgust oylarida 60 ta shunday holat qayd etilgan. Ularning barchasi bo‘yicha tegishli dalolatnomalar rasmiylashtirilgan. Departament zararkunanda va kasalliklar kirib kelishi hamda tarqalishini oldini olish uchun fitosanitariya talablariga qat’iy rioya etishga chaqirmoqda.
Ma’lumot o‘rnida bu Qirg‘iziston karantin qoidalariga rioya etilmagani uchun O‘zbekiston mahsulotlarini qaytargan birinchi holat emas.
Izoh (0)