Rossiyada qirg‘izistonlik migrant Telegram’da Crocus terakti ishtirokchilari haqida yozgan izohi ortidan uch yilga ozodlikdan mahrum etildi. Bu haqda “TASS” xabar berdi.
30 yoshli noqonuniy muhojir Rossiya Jinoyat kodeksining “Terrorizmni amalga oshirishga ommaviy chaqiriqlar” moddasi bo‘yicha uch yilga koloniyaga hukm qilingan. Telegram kanallardan birining izohida u shunday izoh qoldirgan:
“Yigitlar, bunday harakat uchun juda katta jur‘at kerak, afsuski, ular qo‘lga tushdi”, deb yozgan Qirg‘iziston fuqarosi.
Sud migrantga ikki yil davomida saytlarni boshqarishni ham taqiqlagan va u “jinoyat sodir etgan” mobil telefon wsa davlat daromadiga musodara qilingan. Migrantni hibsga olish chog‘ida olib qo‘yilgan telefon sim-kartasi yo‘q qilinadi.
2024-yil noyabr oyida qo‘lga olingan Qirg‘izistonning 30 yoshli fuqarosi sudda rus tilidan o‘z ona tiliga tarjimon talab qilgan. Sudda ma’lum bo‘lishicha, u o‘z aybiga to‘liq iqror bo‘lgan, sodir etgan jinoyatining ochilishiga ko‘maklashgan va qilmishidan pushaymon bo‘lgan, bu esa unga nisbatan jazoni yengillashtirgan.
Taraflar bahsida prokuror ayblanuvchiga 4 yillik ozodlikdan mahrum qilish jazosini tayinlashni so‘radi. Shu bilan birga, sud ayblanuvchining qamoqda o‘tkazgan davrini “kunma-kun” tamoyili asosida jazo muddatiga qo‘shib hisobladi. Hukm hali qonuniy kuchga kirmagan, uning ustidan shikoyat qilish mumkin.
Crocus’dagi terakt
22-mart kuni tunda Moskva viloyatining Krasnogorsk shahridagi Crocus City Hall majmuasida terakt sodir etildi. Rossiya Tergov qo‘mitasi maʼlumotlariga ko‘ra, hodisa oqibatida halok bo‘lganlar soni 145 nafarni tashkil etgan. 550 dan ortiq fuqaro yaralangan. Terakt bo‘yicha tergov doirasida hibsga olinganlar 20 nafarni tashkil qilmoqda. Teraktga aloqadorlikda ayblanib, bir necha Tojikiston fuqarosi qo‘lga olingandi. ISHIDning Xuroson bo‘limi hujum uchun javobgarlikni o‘z zimmasiga olgan. Biroq Rossiya maxsus xizmatlari Ukrainani hujumga aloqadorlikda ayblagan. Rasman Ukraina teraktga aloqadorligini rad etadi.
Izoh (0)