Moskva va Butun Rus Patriarxi Kirill tojikistonliklarga murojaat qilib, ularni Rossiya dini va madaniyatini hurmat qilishga chaqirdi.
Rossiya Tojikistonning ko‘plab aholisiga o‘z eshiklarini ochib, ulardan rus madaniyati va pravoslavligiga so‘zsiz hurmatni kutadi, bu hurmat hamisha rus pravoslav cherkovining Tojikiston zaminida mavjudligiga asos bo‘lib kelgan, — dedi u.
Patriarx rus pravoslav cherkovi va musulmon jamoatchiligining o‘zaro hamkorligi hozirda ikki davlat o‘rtasida “nifoq solishga urinishlar bo‘layotgani” sababli ahamiyatli ekanini aytdi. Ruhoniyning fikricha, bu diniy shiorlar niqobi ostida sodir bo‘lmoqda.
U diniy yetakchilarni terrorchilarni so‘zsiz qoralashga chaqirdi va e’tiqoddan qurol sifatida foydalanishga yo‘l qo‘ymaslik kerakligini ta’kidladi.
Crocus’dagi terakt
Moskva viloyati Crocus City Hall’dagi terakt 22-mart kuni kechqurun sodir bo‘ldi. Bir necha qurollangan shaxslar konsert zali binosiga bostirib kirib, olomonni otib tashlagan, keyin esa binoni yoqib yuborgan. Terakt oqibatida 143 kishi halok bo‘lgan, yuzlab odamlar jarohatlangan. Hujumni sodir etishda Tojikistonning to‘rt nafar fuqarosi ayblangan, sud ular aybiga iqror bo‘lganini ma’lum qilgan.
Mazkur holatdan keyin Rossiyada migrantlarga nisbatan munosabat o‘zgargan. Tojikiston prezidenti hujumni “sharmandali va dahshatli voqea” deb atagan hamda ota-onalarni farzandlari tarbiyasiga jiddiyroq e’tibor qaratishga chaqirgan.
O‘z navbatida, Rossiya tergovchilari terakt ishtirokchilarining oilasini so‘roq qilish uchun Tojikistonga borgan. Shundan keyin Vahdat shahrida yashovchi to‘qqiz nafar tojikistonlik Crocus’dagi terakt ijrochilari bilan aloqadorlikda ayblanib, qo‘lga olingan. Hibsga olinganlar ISHID bilan aloqada bo‘lganlikda ham gumon qilinmoqda.
Dog‘istonda ham aksilterror operatsiya o‘tkazilib, to‘rt nafar Tojikiston fuqarosi ushlangan. Ular teraktning asosiy ishtirokchilarini qurol va pul bilan ta’minlagani aytilmoqda. Rossiya Tashqi ishlar vazirligi Ukraina hukumatini rasman Crocus City Hall’dagi teraktda ayblagan. Ukraina rasman mazkur ayblovlarni rad etgan. O‘z navbatida, ISHIDning Afg‘onistondagi bo‘limi “Viloyati Xuroson” ushbu hujum uchun javobgarlikni o‘z zimmasiga olishini bir necha bor ta’kidlagan.
ISHID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)