Rossiyaning Surgut shahrida oilaviy zo‘ravonlik qurboniga aylangan O‘zbekiston fuqarolari vatanga qaytarildi. Bu haqda “Dunyo” AA xabar berdi.
Maʼlum qilinishicha, 15-may kuni Bosh konsulxonaga I.M. turmush o‘rtog‘i Q.M. tomonidan kuchli bosim va tahqirlarga uchraganligi sababli doimiy yashash manziliga yuborishda amaliy yordam so‘rab murojaat qilgan.
Mazkur oila 2024-yil may oyida voyaga yetmagan ikki nafar farzand bilan birga Rossiyaning Surgut shahriga kelgan. Mazkur oilaning uchinchi farzandi ushbu shaharda tug‘ilgan.
Jabrlanuvchining turmush o‘rtog‘i Rossiya hududida qonuniy bo‘lishi uchun lozim bo‘lgan hujjatlarni rasmiylashtirmagan holda turli joylarda ishlagan. Oiladagi yetishmovchiliklar, tayinli ish joyi va daromadning yo‘qligi sababli mazkur oilada kelishmovchiliklar yuzaga chiqadi. Shundan so‘ng ona bolalarini olib O‘zbekistonga qaytishga qaror qiladi. Bundan xabar topgan ota ularning pasportlarini olib qo‘yadi.
Diplomatlar mazkur oilada bo‘lib Q.M.dan turmush o‘rtog‘i va farzandlarining hujjatlarini olib berdi va ularni Yekaterinburg shahriga olib keldi. Shuningdek, I.M.ning Rossiyada tug‘ilgan uchinchi farzandiga vatanga qaytish guvohnomasi rasmiylashtirildi.
I.M. va uning 3 nafar farzandiga 19-may kungi Yekaterinburg–Namangan aviayo‘nalishidagi samolyotga aviachipta xarid qilindi va O‘zbekistonga kuzatib qo‘yildi.
Xorijdan O‘zbekistonga qaytarilgan bolalar
2024-yil avgust—sentyabr oylarida xorijda ota-ona qaramog‘idan mahrum bo‘lgan 34 nafar bola O‘zbekistonga qaytarilgandi. Oktyabr oyida Rossiyada qarovsiz qolgan 8 oylik chaqaloq O‘zbekistonga, ota-onasi bag‘riga qaytarildi. Moskvadagi voyaga yetmagan huquqbuzarlarni vaqtincha saqlash markazidan 4 nafar bola O‘zbekistonga olib kelindi. O‘sha oyda Turkiyada ota-onasining qarovisiz qolib ketgan uch nafar voyaga yetmagan bola O‘zbekistonga qaytarildi. Noyabrda Dubayni tark etish taqiqlangan o‘zbekistonlik bolaga vatanga qaytishiga yordam berildi. Dekabrda Rossiyada ota-ona qaramog‘isiz qolgan 15 nafar bola O‘zbekistonga qaytarildi.
Shuningdek, Rossiyaning Tiva Respublikasi Oq Dovurak shahrida vaqtincha ishlayotgan va hujjatlarini yo‘qotgan to‘rt nafar O‘zbekiston fuqarosi vatanga qaytarilgandi.
Izoh (0)