Ukraina prezidenti Vladimir Zelenskiy Rossiya 30 kunlik otashkesimga rozi bo‘lmasa ham, 15-may kuni Istanbulga borishga qaror qildi. Bu haqda ukrainalik amaldorga tayanib Axios xabar berdi.
Qotillikni cho‘zishdan ma’no yo‘q. Vladimir Putinni payshanba kuni (15-may) Turkiyada kutaman. Shaxsan. Umid qilamanki, rossiyaliklar bu safar bahona izlamaydi, deb yozgan Ukraina prezidenti.
Putin 15-may kuni Istanbulda Ukraina bilan to‘g‘ridan to‘g‘ri muzokaralarni boshlashni taklif qilgandi. Biroq Rossiya 30 kunlik sulhni boshlash uchun G‘arb davlatlari Kiyevga qurol yetkazib berishni to‘xtatishi kerakligini aytmoqda. Aks holda, Ukraina bu davrdan safarbarlik, rotatsiya, yangi jangchilarni tayyorlash va mavjud kuchlarini tiklash uchun foydalanishini da’vo qilgan.
AQSH prezidenti Donald Tramp esa Ukrainada Moskva bilan tinchlik muloqotini boshlashni talab qilgan.
Ular hech bo‘lmaganda kelishuv imkoniyatini aniqlay oladi. Agar bu imkonsiz bo‘lsa, Yevropa rahbarlari va AQSH vaziyatdan xabardor bo‘lib, tegishli choralar ko‘radi!... Men Ukrainaning Putin bilan kelishuvga borishiga shubha qila boshladim. Putin esa Amerika Qo‘shma Shtatlari yordamisiz hech qachon g‘alaba qozonishi mumkin bo‘lmagan Ikkinchi jahon urushidagi g‘alabani nishonlash bilan ovora. UCHRASHING, HOZIROQ!, degan u.
Zelenskiyning Putin bilan uchrashish chaqirig‘i aynan mazkur bayonotdan so‘ng yangragan. Turkiya prezidenti Rajab Toyyib Erdo‘g‘on 11-may kuni Rossiya prezidenti bilan muloqotda muzokaralarni tashkillashtirishni qo‘llab-quvvatlagandi.
Izoh (0)