Moskva yaqinidagi Reutov shahrida huquq-tartibot idoralari xodimlari tomonidan 16 yoshli o‘smir o‘z maktabida terakt tayyorlaganlikda gumon qilinib qo‘lga olindi.
Aniqlanishicha, o‘smir 1-raqamli maktabda terakt uyushtirmoqchi bo‘lgan. Qo‘lga olish chog‘ida undan uchta pichoq va “dalil ahamiyatidagi ko‘plab yozuvlar” topilgani ma’lum qilingan. U Tojikistondan kelgan bo‘lib, Rossiyada ro‘yxatdan o‘tmagan. Huquq-tartibot idoralari xodimlari uning ijtimoiy tarmoqlarda Rossiyadagi umumta’lim muassasalariga uyushtirilishi mumkin bo‘lgan hujumlar muhokama qilingan “Kolumbayn” guruhiga qo‘shilganini taxmin qilishmoqda.
TASS axborot agentligi Moskva viloyati ta’lim vazirligiga tayanib, sodir bo‘lgan voqea yuzasidan jinoiy ish qo‘zg‘atilganini xabar qilmoqda. Reutovdagi hodisadan so‘ng mintaqadagi barcha ta’lim muassasalarida terrorchilikka qarshi xavfsizlik choralari kuchaytirildi.
Keyinroq Tergov qo‘mitasi boshqarmasi maktab o‘quvchisining qo‘lga olingani haqidagi ma’lumotni tasdiqladi. Idoraning ta’kidlashicha, ish terrorchilik tashkilotida ishtirok etish moddasi (Jinoyat kodeksining 205.5-moddasi 2-qismi) bo‘yicha qo‘zg‘atilgan.
Xabarda aytilishicha, gumonlanuvchining ismi Ruslan S. bo‘lib, u maktabga bostirib kirib, o‘quvchilarga hujum qilishga tayyorgarlik ko‘rgan.
Avvalroq Kurskda qora niqob taqqan, bolg‘a bilan qurollangan 16 yoshli o‘smir maktabga bostirib kirgan edi. Qayd etilishicha, o‘smir binoga yugurib kirib, yo‘lakdagi bitta oynani sindirgan.
Shundan so‘ng, ta’qiblarga qaramay, to‘siqsiz ko‘chaga otilib chiqqan va bir vaqtning o‘zida old eshik oynasini bolg‘a bilan sindirgan. Qochib ketayotib ikkita pichoq va bir shisha yonuvchi suyuqlik solingan sumkani uloqtirib yuborgan. Butun hodisa 2 daqiqadan ko‘proq vaqt ichida sodir bo‘lgan. O‘smir keyinroq qo‘lga olingan.
Izoh (0)