Moskva viloyatidagi Crocus City Hall savdo majmuasiga uyushtirilgan terakt yuzasidan tergov ishi doirasida hibsga olingan shaxslar soni 20 nafarga yetdi. Bu haqda Rossiya Federal xavfsizlik xizmati bergan axborotga asoslanib, “TASS” nashri maʼlumot berdi.
20 nafar gumonlanuvchi hibsda saqlanayotgani haqidagi xabarni shaxsan Rossiya Federal xavfsizlik xizmati raisi Aleksandr Bortnikov tasdiqlagan. Tergov jarayonida Qozog‘iston, Qirg‘iziston, Tojikiston va O‘zbekistondagi tegishli tashkilotlar bilan hamkorlik qilingan.
“Biz hozirda bu vahshiylikka aloqador bo‘lganlarning butun tarmog‘ini aniqlayapmiz. 20 nafardan ortiq odam hibsga olingan. Ular orasida bevosita aybdorlar va ularga ko‘maklashganlar bor”, — degan Aleksandr Bortnikov juma kuni Qirg‘iziston poytaxti Bishkek shahrida o‘tkazilgan Mustaqil davlatlar hamdo‘stligi tashkiloti huzuridagi Milliy xavfsizlikni taʼminlash organlari va maxsus xizmatlar rahbarlari kengashining yalpi yig‘ilishida.
Rossiya rasmiysi savdo markaziga terakt uyushtirishga tayyorgarlik ko‘rish, shuningdek, uni moliyalashtirish, terrorchilarni hududga jo‘natish kabi tadbirlar bevosita ISHID tashkilotining Xuroson bo‘limi tomonidan nazorat qilinganini bildirgan. Jinoyatni sodir etgan 4 shaxsdan ikki nafari Turkiya orqali Rossiyaga kirib kelgan. Teraktdan so‘ng ularga Ukraina chegarasiga borish buyurilgan.
Moskvada ayni paytda terakt aybdorlari bilan bog‘liq tergov davom etayotgani bildirilgan.
Maʼlumot o‘rnida, 22-mart kuni kechki payt Moskva viloyatining Krasnogorsk shahridagi Crocus City Hall majmuasida terakt sodir etildi. Rossiya Tergov qo‘mitasi maʼlumotlariga ko‘ra, hodisa oqibatida halok bo‘lganlar soni 145 nafarni tashkil etgan. 550 dan ortiq fuqaro yaralangan.
Izoh (0)