Ozarbayjon Rossiya fuqarolari uchun mamlakatda bo‘lish qoidalarini kuchaytirmoqchi. Bu haqda Ozarbayjon Tashqi ishlar vazirligi matbuot kotibi Ayxan Gajizade xabar berdi.
Rasmiyning ta’kidlashicha, ushbu choralar Rossiyaning migratsiya siyosatidagi Ozarbayjon fuqarolariga ham ta’sir etuvchi o‘zgarishlarga javoban ishlab chiqilmoqda.
“Mamlakatda vaqtinchalik bo‘lish va migratsiya masalalarida Ozarbayjon tashqi siyosatning boshqa jihatlarida bo‘lgani kabi tenglik va o‘zarolik tamoyillariga amal qiladi”, dedi Gajizade.
U tegishli o‘zgarishlar yaqin kunlarda kuchga kirishini qo‘shimcha qildi.
Rossiya tomoni 26-dekabr kuni chet el fuqarolari uchun yangi qoidalarni e’lon qildi. 1-yanvardan boshlab Rossiyaga vizasiz kiradigan xorijliklar mamlakatda bir yil davomida jami 90 sutkadan ortiq bo‘lishi mumkin emas. Ilgari ularga har yarim yilda 90 kun bo‘lishga ruxsat berilgan edi.
Rossiyada migratsiya siyosatining kuchaytirilishi 22-mart kuni Moskva yaqinidagi Crocus City Hall’da sodir bo‘lgan terakt voqeasidan keyin boshlandi.
Ushbu voqea fonida Rossiya huquq-tartibot organlari noqonuniy muhojirlarni keng ko‘lamli tekshirishni boshladi — bu 2013-yildan beri eng yirik tekshiruv hisoblanadi. Ichki ishlar vazirligi migratsiya qonunchiligiga o‘zgartirishlar kiritish tashabbusi bilan chiqdi. Iyun oyida Davlat dumasi chet el fuqarolarining huquqlarini cheklovchi qonunni qabul qildi. Chora-tadbirlar orasida migrantlarning maxsus reyestrini yaratish, yashash joyini o‘zgartirishni cheklash, transport vositalarini boshqarish, nikoh tuzish va bank hisobvaraqlarini ochish kabi masalalar mavjud.
Izoh (0)