Bugungi kunda xalqaro turizm, mintaqalararo hamkorlik va havo aloqalarini rivojlantirish har qachongidan ham dolzarb. Ana shunday sharoitda, O‘zbekiston milliy aviakompaniyasi Uzbekistan Airways tomonidan ilk bor tashkil etilgan “Markaziy Osiyo – Uzbekistan Airways qanotlarida” forumi nafaqat ikki mamlakat — O‘zbekiston va Rossiya o‘rtasidagi aloqalarni mustahkamlashga, balki butun Markaziy Osiyoning global sayyohlik xaritasidagi nufuzini oshirishga xizmat qildi.
Ushbu forum — O‘zbekistonning xalqaro turizm va transport salohiyatini namoyon etuvchi muhim platforma, yirik biznes vakillari, turizm mutaxassislari hamda ommaviy axborot vositalari uchun strategik muloqot maydoniga aylandi.
Forum davomida Uzbekistan Airways o‘zining xalqaro yo‘nalishlarini kengaytirish, Toshkentni mintaqa tranzit xabi sifatida rivojlantirish va yo‘lovchilar uchun yanada qulay shart-sharoitlar yaratish rejalarini taqdim qildi. Maxsus taqdimot — “Markaziy Osiyo – Uzbekistan Airways qanotlarida” doirasida aviakompaniya o‘z oldiga qo‘ygan maqsadlar, yangilangan reyslar jadvali va servis standartlari haqida ma'lumot berdi.
Shuxrat Yadgarov, Uzbekistan Airways boshqaruvi raisining o‘rinbosari:
— O‘zbekiston boy tarixiy merosga ega, mehmonxona sohasi izchil rivojlanmoqda, shuningdek, faol turizm, tibbiy turizm kabi yo‘nalishlar ham kengayib bormoqda.
Bugungi kunda “Uzbekistan Airways” AJ va RVS orqali haftasiga 135 dan ortiq parvozlarni amalga oshiramiz. Shu imkoniyatdan foydalanib, forum shaklida bizning xizmatlarimizni namoyish etishni, Rossiyadagi sayyohlik sohasining e’tiborini jalb qilishni maqsad qilganmiz. Maqsadimiz – ushbu global raqobatda o‘z o‘rnimizni mustahkamlab, rossiyalik sayyohlarning e’tiborini O‘zbekistonga qaratishdir.
Biz forum orqali nafaqat xizmatlarimizni tanishtirdik, balki sayyohlar uchun yangi imkoniyatlar, hamkorlik istiqbollari va turizm salohiyatimizni ko‘rsatib o‘tdik. Umid qilamizki, bu tadbir Rossiya bozorida bizning pozitsiyamizni mustahkamlashga xizmat qiladi.
Tadbirda O‘zbekistonning sayyohlik salohiyatini namoyon etuvchi rasmiy videorolik namoyish etildi. Forum ishtirokchilari yurtimizning boy tarixi, madaniy merosi, zamonaviy infratuzilmasi va servis sohasidagi yutuqlari bilan yaqindan tanishdilar.
Forum doirasida tashkil etilgan B2B sessiyalarda O‘zbekiston va Rossiyaning yetakchi turoperatorlari o‘zaro tajriba almashib, yangi loyihalar va turpaketlar yaratish, aviatsiya xizmatlarini bozor ehtiyojlariga moslashtirish borasida samarali muloqotlar olib bordi.
“O‘zbekiston bilan hamkorlikni kengaytirish, biznes aloqalarni mustahkamlash – bu bizning strategik maqsadlarimizdan biridir”, — deydi “Araku” kompaniyasi vakili Denis Matyuxin.
— Biz uzoq yillardan beri MICE (korporativ tadbirlar va xizmat safarlari) sohasida ishlaymiz, va bugungi kunda bu yo‘nalishning faol rivojlanayotganini ko‘rib juda xursandmiz. Bu bizning kompaniyamiz to‘g‘ri yo‘nalishda harakat qilayotganining yana bir tasdig‘idir. Endilikda biz kompaniyada yangi yo‘nalish – O‘zbekiston bilan yanada chuqurroq hamkorlik yo‘lga qo‘ymoqchimiz.
Bundan tashqari, biz forumda O‘zbekiston havo yo‘llari vakillari bilan bir qator tashabbuslar haqida suhbatlashdik. Mening fikrimcha, O‘zbekiston havo yo‘llari bugungi kunda bozor o‘zgarishlariga, shu jumladan siyosiy vaziyatlarga tez va moslashuvchan tarzda javob bera oladigan eng dinamik kompaniyalardan biri bo‘lib bormoqda.
Agar biz ilgari surayotgan tashabbuslar o‘z aksini topsa, bu barcha tomonlar uchun foydali bo‘ladi: aviakompaniya qo‘shimcha yo‘lovchi oqimini oladi, mijozlar esa qulay shart-sharoit va yuqori darajadagi xizmatdan bahramand bo‘ladi.
Forumning rasmiy qismida nafaqat taqdimotlar, balki madaniy dastur, o‘zbek milliy taomlari degustatsiyasi, jonli musiqa va esdalik sovg‘alar ham tashkil etildi. Bu esa mehmonlarda O‘zbekistonga nisbatan samimiy munosabat va qiziqishni yanada oshirdi.
“Markaziy Osiyo – Uzbekistan Airways qanotlarida” forumi — bu shunchaki tadbir emas, balki xalqaro turizm va havo aloqalarini mustahkamlash yo‘lida tashlangan jiddiy va ta’sirli qadamdir. Uzbekistan Airways bu yo‘nalishda yetakchi kuch sifatida o‘z salohiyatini yana bir bor namoyon etdi.
Sheriklik huquqi asosida
Izoh (0)