Rossiya va Ukraina Istanbulda erishilgan kelishuvlarga ko‘ra, o‘t ochishni to‘xtatish bo‘yicha o‘z takliflarining tafsilotlarini yopiq tartibda muhokama qiladi. Bu haqda Rossiya TIVning Kiyev rejimi jinoyatlari bo‘yicha maxsus vakolatli elchisi Rodion Miroshnik ma’lum qildi.
“Qisqa bo‘lsa-da, birinchi uchrashuv yakunida o‘t ochishni to‘xtatish rejimini joriy etish shartlari, aniqrog‘i, tomonlarning takliflari aloqa guruhi doirasida ko‘rib chiqilishi to‘g‘risida kelishuvga erishildi. Shu bois hozirda har ikki tomon o‘z takliflarini tayyorlamoqda va ular ham xuddi shunday yopiq muzokaralar tartibida muhokama qilinadi”, dedi diplomat “Rossiya 24” telekanali efirida.
Miroshnikning aniqlik kiritishicha, gap o‘t ochishni to‘xtatish yangi keskinlashuvga emas, balki tinchlikka olib boradigan yo‘l bo‘lishini kafolatlaydigan “nozik jihatlar” va “mexanizmlar” haqida bormoqda.
Rossiya ca Ukraina o‘rtasidagi muzokaralar
10-may kuni Ukraina prezidenti Vladimir Zelenskiy Kiyevda Yevropaning to‘rt davlati rahbarlarini qabul qildi. Sammit yakunida ular qo‘shma bayonot qabul qilib, unda Rossiyadan kamida 30 kun davomida so‘zsiz o‘t ochishni to‘xtatishni talab qildi va yangi sanksiyalar bilan tahdid soldi.
Oradan bir necha soat o‘tib, 11-mayga o‘tar kechasi Rossiya prezidenti Vladimir Putin Kremlda jurnalistlarni to‘plab, Istanbulda 2022-yil bahorida to‘xtab qolgan muzokaralar 15-maydan bir tomonlama tartibda qayta tiklanishini e’lon qildi.
Shundan so‘ng Zelenskiy Turkiyaga kelishini, lekin faqat Putin bilan muzokara olib borishini aytdi. Kreml 14-mayga o‘tar kechasi Rossiya delegatsiyasi tarkibini e’lon qildi. Unga Medinskiy boshchilik qildi.
Rossiya delegatsiyasi 15-may kuni ertalab Istanbulga uchib keldi. Shu kuni tushdan keyin Vladimir Zelenskiy Ukraina rasmiylari bilan birga Turkiya rahbari Rajab Toyyib Erdo‘g‘on bilan muzokaralar o‘tkazish uchun Anqaraga uchib keldi. Uch soatga yaqin davom etgan uchrashuvdan so‘ng Zelenskiy Umerov boshchiligidagi Ukraina delegatsiyasini muzokaralarda ishtirok etish uchun Istanbulga yuborishga roziligini bildirdi.
Istanbulda 16-may kuni Rossiya va Ukraina delegatsiyalari o‘rtasida 2022-yil bahoridan beri birinchi muzokaralar o‘tkazildi. Tomonlar o‘t ochishni to‘xtatish bo‘yicha kelishuvga erisha olmadi, ammo eng yirik asirlar almashinuvini amalga oshirishga kelishib oldi.
Izoh (0)