NATO bosh kotibi Mark Ryutte Istanbuldagi Rossiya—Ukraina muzokaralarida Moskva nomidan qatnashayotgan Rossiya delegatsiyasi tarkibidan norozi ekanini bildirdi. Bu haqda Ryutte NATO tashqi ishlar vazirlari rahbarlarining Antaliyadagi norasmiy uchrashuvidan so‘ng o‘tkazilgan matbuot anjumanida ma’lum qildi.
“Rossiya tinchlik muzokaralari uchun Turkiyaga past darajadagi delegatsiya yuborgani ko‘rinib turibdi. Ukrainaliklarning aytishicha, ular ruslar bilan bir stol atrofida o‘tirib, o‘t ochishni to‘xtatish bo‘yicha kelishishga, darhol muzokaralarni boshlashga, keyingi qadamlarni muhokama qilishga va bu dahshatli urushga chek qo‘yishga tayyor.
Men amerikaliklarga hech qanday maslahat bermoqchi emasman. Nima uchun? Chunki aynan prezident Tramp boshi berk ko‘chadan chiqish yo‘lini topdi. U va uning jamoasi bu vaziyatni qanchalik ishonch bilan hal qilishini ko‘ramiz. Ular keyingi qadamlarni o‘ylab ko‘radi va ittifoqchilar bilan maslahatlashadi. Ammo to‘p ularning tomonida ekani aniq”, dedi u.
Shuningdek, Ryutte Rossiya va Ukrainaning Istanbuldagi muzokaralariga ehtiyotkorona optimizm bilan qarashini aytgan.
“Men ehtiyotkorlik bilan optimist bo‘laman. To‘p hamon Rossiya tomonida. Agar u ham o‘ynashni istasa, keyingi bir necha hafta ichida ba’zi yutuqlarga erishish mumkin”, deb ta’kidladi u.
Uning aytishicha, alyans Ukrainani mudofaa uchun zarur bo‘lgan barcha narsalar bilan ta’minlash maqsadida uni uzoq muddatli qo‘llab-quvvatlashga sodiq.
“Biz Ukrainani uzoq muddatli qo‘llab-quvvatlashimizni tasdiqladik. Gap mojaroni qo‘zg‘atish haqida emas, balki Ukrainani bugun va kelajakda o‘zini himoya qilish imkoniyati bilan ta’minlash haqida ketmoqda”, deydi Ryutte.
Rossiya prezidenti Vladimir Putin 15-may kuni Istanbulda Ukraina bilan to‘g‘ridan to‘g‘ri muzokaralarni boshlashni taklif qilgandi. Ukraina prezidenti Vladimir Zelenskiy mazkur muzokaralarda Putinni shaxsan kutishini aytdi.
14-may kuni Putin muzokaralarda qatnashadigan Rossiya delegatsiya tarkibini tasdiqlagan. Delegatsiya rahbari etib Rossiya prezidenti yordamchisi Vladimir Medinskiy tayinlangan. U 2022-yilda Ukraina va Rossiya delegatsiyalari uchrashganida Rossiya tomonidan muzokaralar guruhi raisi bo‘lgandi.
Shuningdek, Istanbuldagi muzokaralarda tashqi ishlar vaziri o‘rinbosari Mixail Galuzin, Rossiya Qurolli kuchlari Bosh shtabi bosh boshqarmasi boshlig‘i Igor Kostyukov va Rossiya mudofaa vaziri o‘rinbosari Aleksandr Fomin qatnashadi.
Izoh (0)