Turklarning murakkab syujetlari, yirik ijodiy guruhlari va yulduzlarining o‘ziga xos obrazlari ko‘plab muxlislar qalbini zabt etgan. Har bir yangi loyiha nafaqat turk tomoshabinlarining, balki O‘zbekiston aholisining ham diqqatini tortadi. Yaqinda Box Office kompaniyasi so‘nggi besh yil ichidagi statistikani tahlil qilib, reytingning turli toifalarida eng yuqori natijalarni ko‘rsatgan turk seriallarini aniqladi.
Serialning taqdiri odatda turk tomoshabinlari tomonidan hal qilinadi. Boshqa mamlakatlardan bo‘lgan auditoriya esa o‘ziga yoqqan dizining yangi epizodi chiqishini sabrsizlik bilan kutadi. Reytinglarni aynan Turkiya ichidagi televizor dekoderlari (maxsus qurilmalar) orqali aniqlashadi. Shuni ham aytish kerakki, bu qurilmalar har bir uydan topilmaydi.
Qaysi seriallar turk tomoshabinlarini shu darajada o‘ziga tortdiki, ular televizor ekranidan uzilmaydi?
Biz ABC1 toifasiga e’tibor qaratamiz — bu toifa 20 yoshdan katta va yuqori daromadga ega tomoshabinlar sonini hisobga oladi. Reklamachilar uchun aynan shu auditoriya eng jozibali hisoblanadi. Balki siz ham ushbu ro‘yxatdan ko‘rmagan, lekin ko‘rishga arziydigan serial topishingiz mumkin.
12-o‘rin: Elchining qizi — 12,77 foiz (Total kategoriyasi bo‘yicha)
Garchi bosh aktrisa Neslihan Atagul salomatligi tufayli serialni tark etgan bo‘lsa-da, “Elchining qizi” uzoq vaqt davomida eng ko‘p tomosha qilingan seriallardan biri bo‘lib qoldi. Reklamachilar yosh va daromadli auditoriya tufayli serialga katta qiziqish bildirishdi. Aktrisaning ketgani sizni to‘xtatmasa, tomosha qilib ko‘rishga arziydi.
11-o‘rin: “Marvarid donalari” — 13,02 foiz (ABC1)
Bahsli va provokatsion bo‘lishiga qaramay, “Marvarid donalari” seriali ko‘plab tomoshabinlar qalbidan joy oldi. Hatto senzura qo‘mitasi uni to‘xtatishga harakat qilgan. Bugungi kunda uchinchi mavsumga ham uzaytirildi. Agar 2025-yil yozida bo‘sh vaqtingiz bo‘lsa, aynan shu serialni ko‘ring.
10-o‘rin: “Qizil sharbat” — 13,12 foiz (ABC1)
“Qizil sharbat” hozirda “Qo‘rg‘on sirlari” (Zimorodok) serialidan ham ommabop bo‘lib ketgan. Garchi rekord o‘rnatmagan bo‘lsa-da, 4-mavsumga uzaytirildi. “Qo‘rg‘on sirlari” tugaganidan keyin o‘xshash kayfiyatdagi serial izlayotganlar uchun ayni muddao.
9-o‘rin: “Qo‘rg‘on sirlari”— 13,84 foiz (ABC1)
2022—2023-yillarda reytinglarni larzaga solgan serial. Afra Saracho‘g‘lu va Mert Ramazon Demir ishtirokidagi birinchi mavsum ommaviy e’tiborni to‘pladi. Ammo uchinchi mavsumda reytinglar tushib ketdi. Shunga qaramay, o‘z davrining eng yodda qoladigan seriallaridan biri hisoblanadi.
8-o‘rin: “Xiyonat” — 13,87 foiz (ABC1)
“Xiyonat” seriali ham Turkiyada yoshlar auditoriyasi tomonidan yuqori baholandi. Reytinglar bo‘yicha “Qizil sharbat” va “Qo‘rg‘on sirlari”ni ortda qoldirib, muvaffaqiyatli o‘ringa chiqdi. Bu britaniyalik serial “Doktor Foster”dan olingan. Turklarga oshkora bo‘lgan xiyonatni, Asiyaning hayotini boshdan-oyoq ag‘darib yuborgan hikoyani yanada ishonchli tarzda ko‘rsatish muvaffaqiyatli bo‘ldi.
Asosiy qahramon ayolda hamma narsa bor edi: baxtli nikoh, sevimli o‘g‘li, ajoyib uy va muvaffaqiyatli shifokor kasbi. Ammo mukammal kartinani boshqa bir kishi tomonidan ishlatilgan lab bo‘yog‘i va erining kiyimida qolgan uzun sochlar buzdi.
Ayol o‘zi hayotini ishonib topshirmoqchi bo‘lgan kishining aldovini fosh qiladi, va uning dunyosi qulaydi. Dramatik hikoya turk tomoshabinlari tomonidan befarq o‘tkazib yuborilmaydi, chunki ular bunday burilishlarni juda yaxshi ko‘rishadi, hatto buni o‘zlari tan olishmasa-da.
7. “Bahor” — ABC1 toifasida 14,79 foiz
Turkiyada navbatdagi muvaffaqiyatli remeyk — “Bahor” seriali dastlab ko‘p e’tibor qozonmagan edi. Ammo beshinchi qismda 14,79 foiz reyting olib, ko‘plab reklama beruvchilarni jalb qildi. Natijada serial ikkinchi, keyin esa uchinchi mavsumga uzaytirildi.
Syujetda hayotini oilasiga bag‘ishlab, shifokorlikdan voz kechgan Bahor hayot-mamot yoqasiga keladi. Biroq erining sovuq qarori — donorlikdan bosh tortishi uni o‘zgarishga majbur qiladi. Bahor shifoxonaga amaliyotchi sifatida qaytib, o‘z hayotini butkul o‘zgartirishga qaror qiladi.
6. “Chukurovada bir vaqtlar” — ABC1 toifasida 15,49 foiz
Ushbu serial “Qulupnay sharbati”dagi Sibel Toshchiog‘lu ishtirok etgan yana bir kuchli loyiha hisoblanadi. Serial sekin rivojlansa-da, yillar davomida yuqori reytinglar bilan efirda qolgan. Tomoshabinlar o‘rtasida bu loyihani “Sevgi iztirobi”ning qishloq variantiga o‘xshatishgan.
Asosiy mavzu — imkonsiz va taqiqlangan sevgi. Serial Turkiyada hatto Emmy mukofotini olgan boshqa dramalardan ham reytingda o‘zib ketgan.
5. “Tashkilot” — ABC1 toifasida 15,98 foiz
Yana bir loyiha, bu Rossiya tomoshabinlaridan o‘tib ketgan bo‘lsa-da, turk auditoriyasi tomonidan juda sevildi. “Tashkilot” serialining birinchi mavsumi eng muvaffaqiyatli bo‘ldi, bu esa ajablanarli emas, chunki deyarli barcha seriallar boshlanishida yuqori reytinglarga erishadi. Ammo keyinchalik syujet ham, reytinglar ham pasayib boradi. Syujet milliy tashkilot doirasida ishlovchi maxsus bo‘linmaning faoliyatini tasvirlaydi.
4. “Begunohlar uyi” — ABC1 toifasida 16,42 foiz
Rossiyada “Begunohlar uyi” seriali unchalik mashhur bo‘lmagan, chunki u “Qalbim eshigini qoq” serialining namoyishi bilan bir vaqtda chiqdi va uning final qismi “Qo‘rg‘on sirlari” birinchi mavsumining boshlanishiga to‘g‘ri keldi. Shunga qaramay, loyiha birinchi va ikkinchi seriallarni ortda qoldira oldi, bu esa uning muvaffaqiyatini ko‘rsatadi. Qiziqarli jihati, serial Gyulseren Budayjiog‘lu tomonidan yozilgan “Medalyon ichida” kitobi asosida suratga olingan. Aynan shu muallif tomoshabinlarga Seyran va Ferit hikoyasini taqdim etgan edi.
Har bir qahramonning jiddiy ruhiy buzilishi bor (hatto bittadan ko‘p). Uyda tartibni boshqaruvchi asosiy qahramon — Xan. Birinchi nazarda u oilasidagi yagona aql-idrokli odamdek tuyuladi, lekin unga ham oson emasligini tan olish kerak.
3. “Hukmdor Usmon” — ABC1 toifasida 16,7 foiz
“Hukmor Usmon” — tarixiy loyiha bo‘lib, bunday seriallar doimo turk tomoshabinlari qalbiga yo‘l topadi. Burak Ozchivit bosh rolni ijro etgan serial 2019-yildan beri efirda, va 2025-yilda yana bir mavsumga uzaytirilgani ma’lum bo‘ldi. Bu uning raqamlardan ko‘ra ko‘proq muxlislar mehriga sazovor ekanini ko‘rsatadi. Maksimal reyting — 16,7 foiz ABC1 toifasida. Serial nafaqat reytinglar, balki xorijiy sotuvlar orqali ham efirda qolmoqda.
Loyihada Usmoniylar imperiyasining tashkil topishi va Ertug‘rul o‘g‘li Usmon qahramonliklari hikoya qilinadi.
2. “Olis shahar” — ABC1 toifasida 17,12 foiz
2024-yil oxirida chiqqan yangi serial boshida juda katta reytinglarga ega bo‘lmagan, ammo tez orada sodiq muxlislar to‘pladi. “Olis shahar” joylashgan hudud — Turkiyaning janubi-sharqiy qismi, o‘ziga xos me’morchilik va tabiiy go‘zalliklarga boy.
Asosiy ayol rolini yana Sinem Unsal ijro etadi, bosh rol esa iste’dodli Ozan Akbaba qo‘lida. Birinchi qismdan tomoshabinlar beva ayol bilan tanishadi. U Toronto shahridan farzandi bilan Turkiyaga kelib, erini so‘nggi vasiyatini bajarib, uni vatanida dafn etmoqchi bo‘ladi. Shu paytda hayoti tubdan o‘zgaradi va u o‘zi uchun mutlaqo begona bo‘lgan dunyoga tortilganini his qiladi.
Demak, deyarli har bir yangi qism serial reytinglarini oshiradi, chunki qiziqarli voqealar, kutilmagan burilishlar, aktyorlarning o‘yinlari, ajoyib musiqa va chiroyli suratga olish tomoshabinlarni keng qamrab oladi. Hozirgacha maksimal reyting 17,12 foiz ni tashkil qilmoqda, ammo birinchi mavsum yakuni “G‘aroyib doktor” rekordini yangilaydi, deb umid qilamiz.
1. “G‘aroyib doktor” — ABC1 toifasida 20,54 foiz
“G‘aroyib doktor” serialidan olingan kadrdan so‘ng, uni “Olis shahar” bilan taqqoslash tabiiyligini tushunasiz. Garchi ular mavzular jihatidan butkul farq qilsa ham, ikkala serialda ham bosh qahramon ayol rolini Sinem Unsal ijro etadi.
Hech kim “G‘aroyib doktor” koreys doramasining remeyki shuncha yuqori reyting olishini kutmagan. Bundan tashqari, Turkiyada tibbiyot mavzusi unchalik mashhur emas.
Asosiy qahramon savant sindromiga chalingan shifokor edi. U odamlar bilan muomala qilishda qiyinchiliklarga duch keladi. Bu nafaqat bemorlar, balki hamkasblari bilan munosabatga salbiy ta’sir qiladi. Shunga qaramay, Ali o‘z o‘rnini nafaqat shifoxonada, balki hayotda ham topadi.
Izoh (0)