O‘zbekiston asalni asosan AQSH va Afg‘onistonga eksport qilmoqda. Bu haqda Veterinariya va chorvachilikni rivojlantirish davlat qo‘mitasi xabar berdi.
Qayd etilishicha, 2024-yil va 2025-yilning to‘rt oyi davomida 206 ming dollar qiymatida 64 tonna asal eksport qildi. Asalning 92 foizi AQSH va 7 foizi Afg‘onistonga eksport qilingan. Bu yil birinchi marta Xitoyga eksport qilish yo‘lga qo‘yildi.
Shuningdek, 2024-yil va 2025-yilning to‘rt oyi davomida 5 mln AQSH dollari miqdorida 260 ming dona asalari paketlari eksport qilingan. Asalari paketlari asosan Rossiya, Qozog‘iston va Armanistonga eksport qilingan bo‘lsa, bu yil eksport geografiyasiga Tojikiston ham qo‘shilgan.
Asalari paketlari eksporti o‘tgan yilning mos davriga nisbatan 1,5 baravarga oshdi.
Tabiiy asalni qalbakisidan qanday ajratish mumkin?
Sotuvchilar tomonidan haqiqiy bo‘lmagan asallarni sotish uchun bir nechta hiyla-nayranglar qo‘llanadi. Sifatli va tabiiy asalni sintetik yoki suyultirilgan asaldan farqlash uchun uni hidlab ko‘rish va sinchiklab ko‘zdan kechirish lozim, deya maslahat berdi asalarichi Natalya Motorina.
Mutaxassis so‘zlariga ko‘ra, agar asalda ko‘pik va pufakchalar bo‘lsa, bunday mahsulotdagi organik moddalarning achishidan darak beradi. Ya’ni asalga suv qo‘shib, eritilgan deganidir.
Rangi tiniq bo‘lmagan, ichida dog‘lar va quyqalar mavjud asal ham tabiiy emas. Agar asalning hidi juda zaif bo‘lsa, uning sifati pastligini va qo‘shimchalar solinganini bildiradi. Asalning ta’mi shirin emas, balki biroz taxir bo‘lishi unga sirop qo‘shilganini anglatadi.
Izoh (0)