Katta yettilik davlatlari tashqi ishlar vazirlari Moskva yaqinidagi Crocus City Hall’da sodir etilgan teraktga Ukrainaning aloqadorligini tan olishdan bosh tortmoqda. Bu haqda “RIA Novosti” xabar berdi.
Avvalroq Rossiya bosh prokurori Igor Krasnov Krasnogorskda sodir etilgan terakt ishida Ukraina izi yaqqol ko‘rinayotgani, huquq-tartibot idoralari xodimlari jinoyat tashkilotchilarining shaxsini aniqlash bo‘yicha sa’y-harakatlarni amalga oshirayotganini ma’lum qilgandi.
Biz Rossiya rasmiylarining 22-mart kuni Moskva yaqinidagi fojiali teraktda Ukrainani ayblashga bo‘lgan asossiz urinishlarini qat’iyan rad etamiz, — deyiladi Italiyaning Kapri orolida bo‘lib o‘tgan yig‘ilish yakunlari bo‘yicha e’lon qilingan G7 kommyunikesida.
22-mart kuni Moskva yaqinidagi Krasnogorskda joylashgan Crocus City Hall konsert zalida terakt sodir bo‘lgan edi: hujumchilar binodagi odamlarga qarata avtomatlardan o‘t ochgan. 145 kishi halok bo‘lgan.
23-mart kuni Bryansk viloyatida terakt sodir etgan to‘rt nafar jinoyatchi qo‘lga olingan. Rossiya prezidenti Vladimir Putin ular qochishga uringanini va Ukraina tomon harakat qilishganini aytgan. Rossiya Xavfsizlik kengashi kotibi Nikolay Patrushevning ta’kidlashicha, tergov mazkur teraktning bevosita aybdorlari va Ukraina o‘rtasidagi aloqani tasdiqlagan va protsessual jihatdan mustahkamlagan.
Tergov qo‘mitasiga ko‘ra, tergov Crocus’dagi teraktni amalga oshirgan jangarilarning tayyorgarligi haqida muhim maʼlumotlarga ega bo‘lgan, bu ularning Ukraina maxsus xizmatlari bilan aloqasi borligini isbotlashi mumkin.
Izoh (0)