Tojikiston Tashqi ishlar vazirligi o‘z fuqarolariga agar zarurat bo‘lmasa, Rossiyaga sayohat qilmaslikni tavsiya qildi. Tegishli bayonot 27-aprel kuni vazirlikning rasmiy saytida e’lon qilindi.
26-aprel kuni Tojikiston Tashqi ishlar vazirligi saytida vazirlikda Rossiya elchisi Sergey Grigoryev bilan uchrashuv o‘tkazilgani haqida xabar e’lon qilingan edi. Unda aytilishicha, tomonlar so‘nggi bir necha hafta ichida Tojikiston fuqarolari Rossiya davlat chegarasini kesib o‘tishda duch kelgan qiyinchiliklarni muhokama qilgan.
Tojikiston tomoni tojik fuqarolarining Rossiyaga kirishini asossiz rad etish holatlari keng tarqalib ketganidan xavotir bildirgan.
Moskva viloyatida joylashgan Crocus City Hall konsert zalidagi teraktdan so‘ng Tojikiston Mehnat vazirligi Rossiyadan “kundalik darajada” ta’qibga uchragan mehnat muhojirlarining chiqib ketishini qayd etgan. Tojikistondan kelgan muhojirlar ayblangan teraktdan so‘ng Rossiya shaharlarida xorijliklarga qarshi ommaviy tekshiruvlar o‘tkazila boshlandi.
Avvalroq Moskvaning Basmanniy sudi Crocus’dagi terakt bo‘yicha o‘n ikkinchi gumonlanuvchini 22-maygacha hibsga oldi. 21 yoshli Tojikiston fuqarosi Jumaxon Qurbonov terakt sodir etgan shaxslarni to‘lovlar va aloqa vositalarini to‘lash uchun pul bilan ta’minlaganlikda gumon qilinmoqda. “RIA Novosti” sudga tayanib, Qurbonov Rossiyada norasmiy ishlagan va o‘z vatanida ro‘yxatga olinganini yozgan. Moskvada u yotoqxonada yashagan.
Izoh (0)