Rossiya va Ukraina o‘rtasida 30 kunlik sulh boshlanishi uchun G‘arb davlatlari Kiyevga qurol yetkazib berishni to‘xtatishi kerak. Bu haqda Kreml matbuot kotibi Dmitriy Peskov ma’lum qildi.
Agar biz o‘t ochishni to‘xtatish haqida gapiradigan bo‘lsak, Ukraina har kuni AQSH va Yevropa davlatlaridan oladigan qurol-yarog‘ ta’minoti bilan nima qilishimiz kerak?, dedi u.
Peskov tinchlik sulhi kuchga kirishidan oldin qurol-yarog‘ yetkazib berish to‘xtatilishi kerakligini aytdi. Aks holda, Ukraina bu davrdan safarbarlik, rotatsiya, yangi jangchilarni tayyorlash va mavjud kuchlarini tiklash uchun foydalanishini da’vo qildi.
Nima uchun biz Ukrainaga bunday imkoniyatni taqdim etishimiz kerak?, dedi Putinning matbuot kotibi.
Peskovning ta’kidlashicha, Rossiya prezidenti “mojaroni tinch va diplomatik yo‘llar bilan hal etish uchun barcha sa’y-harakatlarni amalga oshirmoqda”.
Biroq qo‘limizda tinch va demokratik vositalar bo‘lmagani sababli harbiy operatsiya (urush)ni davom ettirishga majburmiz, dedi u.
Shunga qaramay, Rossiya AQSH prezidenti Donald Trampning shaxsiy vositachiligi vaziyatni o‘zgartirishi mumkinligiga umid bildirdi.
Umid qilamizki, Vashingtonning sa’y-harakatlari Kiyev pozitsiyasiga biroz moslashuvchanlik va siyosiy iroda olib kirishga yordam beradi, deb ta’kidladi Peskov.
Putin “insonparvarlik mulohazalaridan kelib chiqib”, G‘alabaning 80 yilligini nishonlash davrida uch kunga o‘t ochishni to‘xtatishni e’lon qilgan edi. Tinchlik rejimi 7-may yarim tundan kuchga kirgan va 11-may yarim tungacha davom etadi. Ukraina prezidenti Vladimir Zelenskiy buni “manipulyatsiyaga urinish” deb atagan va yanada kengroq qadamni — 30 kun muddatga o‘t ochishni to‘liq to‘xtatishni taklif qilgan.
Uzoq muddatli sulhga chaqiriq tez orada Donald Tramp tomonidan ham yangradi. U Moskva va Kiyev kamida bir oyga “shartlarsiz” o‘t ochishni to‘xtatishi kerakligini aytdi.
Agar o‘t ochishni to‘xtatishga rioya qilinmasa, AQSH va uning hamkorlari qo‘shimcha sanksiyalar kiritadi, dedi Tramp.
Izoh (0)