Rossiyadagi koloniyadan tunnel qazib qochgan 5 nafar o‘zbekistonlikka hukm o‘qildi

Rossiyaning Lipetsk shahridagi koloniyadan 2024-yil yozida tunnel qazib qochib ketgan 6 nafar mahbusga sud hukmi o‘qildi. Ularning besh nafari O‘zbekiston fuqarosi bo‘lgan. Bu haqda Voronej viloyati prokuraturasi matbuot xizmati xabar berdi.

Mahbuslar Rossiya Jinoyat kodeksining 313-moddasi (bir guruh shaxslar tomonidan ozodlikdan mahrum etish joyidan qochish) bo‘yicha aybdor deb topilgan. Ular 4,5 yildan 12,5 yilgacha ozodlikdan mahrum etilgan. Lipetsk shahridagi 2-sonli koloniyada jazo o‘tayotgan mahkumlar 2 oy davomida metall list, metall quvur bo‘lagi, belkurak va kesuvchi disk yordamida tunnel qazigan.

Tunda ular koloniya hududidan chiqib, Tambov va Moskva tomon bir necha o‘n kilometr masofani bosib o‘tgan. Ertasi kuni besh nafar mahbus qo‘lga olingan. Oltinchisi deyarli ikki hafta yashirinishga muvaffaq bo‘lgan.

30 metrdan uzun bo‘lgan yerosti yo‘li koloniyaning himoya panjarasi ostidan o‘tgan. 2024-yil 25-oktyabr kuni besh nafar O‘zbekiston fuqarosi va bir nafar Tojikiston fuqarosi bo‘lgan mahbuslar aynan shu yo‘l orqali qochib ketgan. To‘rt nafar mahkum jazoni qattiq tartibli koloniyada, ikki nafari umumiy tartibli koloniyada o‘taydi.

Koloniyadan qochgan mahbuslar qanday jazo o‘tayotgan edi?

Markaziy Osiyo fuqarolari pedofiliya, giyohvand moddalar va bosqinchilik uchun qamalgan. “Lenta.ru” ma’lumotlarga ko‘ra, qochqinlar ro‘yxati quyidagicha:

• Parvozbek To‘raboyev 19 yoshda, O‘zbekiston fuqarosi, Rossiya Jinoyat kodeksining 228.1-moddasi (giyohvand moddalar) bo‘yicha 4 yilga ozodlikdan mahrum etilgan;
• Xurshidbek G‘aniyev 19 yoshda, O‘zbekiston fuqarosi, ro‘yxatdan o‘tgan joyi to‘g‘risidagi ustunda “bomj” deb ko‘rsatilgan, Rossiya Jinoyat kodeksining 228.1-moddasi (giyohvand moddalar) bo‘yicha 6 yilga ozodlikdan mahrum etilgan;
• Dilshod Arslonov 28 yosh, O‘zbekiston fuqarosi, 12 yoshdan 14 yoshgacha bo‘lgan bolani zo‘rlaganlikda ayblanib sudlangan;
• Turg‘un Abdullayev 28 yosh, O‘zbekiston fuqarosi, nomusga tegishda ayblanib, 12 yilga ozodlikdan mahrum etilgan;
• Baxtiyor Jumayev 28 yosh, O‘zbekiston fuqarosi, nomusga tegish aybi bilan 7,5 yilga ozodlikdan mahrum etilgan;
• Davron Jabborov 27 yosh, Tojikiston fuqarosi, 2022-yilda zo‘rlash va bosqinchilikda ayblanib, 6 yilga ozodlikdan mahrum etilgan.