Afg‘onistonning “Tolibon” harakati qo‘shni Pokiston tomonidan tashkil etilgan musulmon olamida qizlar ta’limi bo‘yicha global sammitda ishtirok etmaydi. Bu haqda Pokiston ta’lim vaziri Xolid Maqbul Siddiqiy ma’lum qildi.
“Biz Afg‘onistonni taklif qildik, ammo afg‘on hukumatidan hech kim konferensiyaga kelmadi”, dedi Siddiqiy.
Islomobodda 11-yanvar kuni “Musulmon jamoalarida qizlarning ta’limi: muammolar va imkoniyatlar” mavzusida ikki kunlik xalqaro konferensiyaga start berildi. Unda 47 mamlakatdan 150 ga yaqin vakil ishtirok etmoqda. Ishtirokchilar orasida tinchlik bo‘yicha Nobel mukofoti sovrindori Malala Yusufzay ham bor.
“Men barcha qizlarning maktabga borish huquqini himoya qilish hamda rahbarlar nima uchun “Tolibon”ni afg‘on ayollariga qarshi jinoyatlari uchun javobgarlikka tortishlari kerakligi haqida gapiraman”, deb yozdi u X ijtimoiy tarmog‘ida.
Dekabr oyi boshida afg‘on ayollariga oliy va o‘rta tibbiy ta’lim muassasalarida o‘qish taqiqlandi. Yaqin vaqtgacha ushbu muassasalar mamlakat ayollari uchun oliy ta’lim olishning yagona imkoniyati bo‘lib kelgan, chunki 2022-yil dekabr oyida Tolibon Afg‘oniston ayollarining universitetlarga kirishiga to‘sqinlik qilgan edi.
“Tolibon” hokimiyat tepasiga kelgach, mamlakatda bir qator taqiq va cheklovlarni, birinchi navbatda, ayollarga nisbatan joriy eta boshlagan edi.
Afg‘onistonda ayollarga nisbatan joriy qilingan taqiqlar quyidagilar:
- afg‘onistonlik ayollarning BMT idoralarida ishlashi;
- erkaklarga ayollar uchun kiyim tikish;
- ayollarning erkak shifokorlarga borishi;
- ayollarning shifoxonaga yolg‘iz borishi;
- ayollarning istirohat bog‘iga tashrif buyurishi,
- oilalar va ayollarning bog‘lari yoki yashil hududlari bo‘lgan restoranlarga kirishi,
- ayollar ovozi eshitilgan reklamalarni efirga uzatish,
- ayollarning sotuvchilari bilan savdolashish,
- akusher va hamshiralikka o‘qish,
- ayollarga bir-biri bilan gaplashish taqiqlangan.
Afg‘oniston oliy ta’lim vaziri Neda Muhammad Nadim qizlarning dunyoviy oliy o‘quv yurtlarida ta’lim olishi islom qonunlarini buzishi va islom an’analariga zid ekanligini aytdi.
Izoh (0)