Yevropa Ittifoqi (YI) “Tolibon”ning ayollar erkinligiga qo‘ygan yangi cheklovlarini, jumladan, ularning istirohat bog‘lari va sport klublariga kirishini taqiqlaganini qoraladi. Bu haqda Aamaj news xabar berdi.
YI e’lon qilgan bayonotida “Tolibon” harakatini o‘z majburiyatlarini buzganlikda aybladi, ularning yangi cheklovlari “afg‘on ayollari va qizlari huquqlarini qattiq poymol qilishdan tashqari, ularning va’dalariga zid” ekanini bildirdi. “Tolibon”dan Afg‘onistonning xalqaro huquq, xususan, inson huquqlari, qochqinlar huquqlari va gumanitar qonunlar doirasidagi majburiyatlarini hurmat qilish so‘raldi.
Shuningdek, bayonotda “Tolibon”ning 2021-yilgi qoidalari afg‘on ayollarining “ijtimoiy va iqtisodiy hayotning deyarli barcha sohalaridan mahrum bo‘lishiga” sabab bo‘lgani qayd etildi.
Eslatib o‘tamiz, noyabr oyida “Tolibon” hukumati ayollarning istirohat bog‘i va sport zallariga tashrif buyurishini taqiqlab qo‘ydi. Bu taqiq afg‘on ayollari uchun anchadan buyon amal qilib kelayotgan boshqa bir qator cheklovlar qatoriga qo‘shildi.
“Tolibon” hukumati ayollarning ishlash va o‘qish huquqlarini cheklab qo‘ygan. Qizlarning maktablarga borishiga va ayollarning ishlashiga ruxsat berilmaydi. Shu bilan birgalikda, qonunlarga ko‘ra, ayollar ko‘chada yuzlarini to‘liq yopishlari kerak va erkaksiz uydan chiqishga haqli emaslar. Hozircha dunyoning hech bir davlati “Tolibon” hukumatini tan olmagan.
Xalqaro hamjamiyatning “Tolibon”ni tan olish sharti mamlakatda inklyuziv hukumatni shakllantirish, shuningdek, ayollar va qizlarning asosiy huquq va erkinliklarini ta’minlashdan iborat bo‘ladi.
Mavzuga doir:
- “Tolibon” yetakchisi jinoyatchilarni “shariat qonunlari” asosida jazolashni buyurdi
- Afg‘onistonda “Tolibon” harakatini Facebook‘da tanqid qilgan yigit qamoqqa olindi
- “Tolibon” Kobul aholisini uylariga videokuzatuv kameralari o‘rnatishga chaqirdi
- Afg‘onistonda “Tolibon” vakili unga turmushga chiqishdan bosh tortgan o‘smir qizni o‘ldirdi
Izoh (0)