“Tolibon” ayollarga ta‘lim olish va ishlash huquqini taqiqlagan bo‘lsa-da, Afg‘oniston bosh vaziri o‘rinbosari Abdul G‘ani Barodar fuqarolardan o‘z huquqlariga ega chiqishni talab qildi. Bu haqda Hasht-e Subh Daily xabar berdi.
“Tolibon” nazorati ostidagi Baxtar agentligi Barodarning so‘zlaridan iqtibos keltirdi va odamlarni o‘z huquqlaridan mahrum qilmaslik kerakligini yozdi. Barodarning bayonoti Kobulda 25-dekabr kuni bo‘lib o‘tgan yig‘ilishda e’lon qilingan.
Mulla Barodarning bayonoti bilan bog‘liq qo‘shimcha tushuntirishlar berilmagan bo‘lsa-da, so‘nggi kunlarda “Tolibon” ayollarning ta’lim olish, ishlash huquqini to‘xtatgani tanqidlarga sabab bo‘lmoqda. Ayrim afg‘on manbalari bu qarorga “Tolibon”ning aksar rasmiylari ham qarshiligini bildirgan.
Ayni paytda “Tolibon” yetakchisi mulla Haybatulla Oxundzoda ayollarning ta’lim olishiga qo‘yilgan taqiqning bekor qilinishi yuzasidan “Haqqoniy tarmog‘i” guruhi asoschisining o‘g‘li Sirojiddin Haqqoniy va “Tolibon” asoschilaridan birining o‘g‘li Mulla Yoqub bilan uchrashishdan bosh tortgan.
“Tolibon” harakati Afg‘onistondagi universitet va o‘rta maktabalrni ayollar uchun yopgan. Ayollarga nodavlat tashkilotlarida ishlashga ham taqiq qo‘yilgan. Yevroittifoq “Tolibon”ning taqiqi insoniyatga qarshi jinoyat ekanini e’lon qilgan. Qator davlatlar bundan norozilik bildirgan. “Tolibon” ayollarning universitetda tahsil olishiga qo‘yilgan taqiq sababi talaba qizlarning hijob o‘ramagani ekanini aytgan.
Afg‘onistonda ayollarning shifoxonaga yolg‘iz borishi ham mumkin emas. Bundan tashqari ayollarga SIM-karta sotib olish ham taqiqlangan. Bundan tashqari, ayollarni omma oldida qamchilash boshlangan.
Izoh (0)