“Tolibon” Afg‘onistonda ayollar ta’limi taqiqlanishiga norozilik bildirgan professorni hibsga oldi

“Tolibon” mamlakatda ayollarning ta’lim olishi taqiqlanishiga norozilik bildirib diplomlarini yirtib tashlagan professorni hibsga oldi. Bu haqda Al-Jazeera xabar berdi.

Professor Ismoil Mash’al mazkur diplomlar unga kerak emasligi, chunki Afg‘oniston ta’lim olish joyi emasligini aytgandi.

“Agar singlim va onam o‘qiy olmasalar, men bu ta’limni qabul qilmayman”, — degandi u.

Mash’alning yordamchisi Farid Ahmad Fazliy professor “Tolibon” hukumati a’zolari tomonidan “shafqatsizlarcha kaltaklangani” va o‘ta hurmatsiz tarzda olib ketilganini aytdi. “Tolibon” rasmiysi uning hibsga olinganini tasdiqladi.

“Mash’al domla bir muncha vaqt tizimga qarshi provokatsion harakatlarga qo‘l urdi. Xavfsizlik idoralari uni tergovga olib ketdi”, — dedi “Tolibon” Axborot va madaniyat vazirligi direktori Abdul Haq Hammad.

2022-yil dekabr oyida ayollarning universitetda o‘qishini taqiqlash to‘g‘risidagi qaror “Tolibon”ning yuqori amaldorlarida norozilikka sabab bo‘ldi. “Tolibon”ning yuqori martabali amaldorlari mazkur taqiq sababli o‘zlarining oliy yetakchisi mulla Haybatulla Oxundzodani taxtdan ag‘darish masalasini ko‘rib chiqmoqda.