“Tolibon” rasmiysi ayollar uchun universitet va maktablar mart oyidan qayta ochilishini aytdi
“Tolibon” harakati rasmiysi ayollarga universitet va o‘rta maktablar mart oyidan boshlab qayta ochilishini ma’lum qildi. Bu haqda Sputnik xabar berdi.
Ma’lum qilinishicha, 2023-yil mart oyida qizlarning ta’lim olishiga oid qaror qabul qilinadi. “Tolibon” muvaqqat hukumatining kon va neft sanoati bo‘yicha vaziri Shahobiddin Delavar bu haqda gapirgan.
“Hamal oyigacha, shariat va afgʻon anʼanalariga mos keladigan oʻrta maktab, boshlangʻich maktab va universitetlar boʻyicha qaror qabul qilinadi”, — degan Delavar
Afg‘onistonda “Tolibon” harakati universitet va o‘rta maktablarni ayollar uchun yopgan. Ularga nodavlat tashkilotlarida ishlashga ham taqiq qo‘yilgan. Ayollarga ta‘lim olish va ishlash huquqini taqiqlagan bo‘lsa-da, Afg‘oniston bosh vaziri o‘rinbosari Abdul G‘ani Barodar fuqarolardan o‘z huquqlariga ega chiqishni talab qilgan.
Mulla Barodarning bayonoti bilan bog‘liq qo‘shimcha tushuntirishlar berilmagan bo‘lsa-da, so‘nggi kunlarda “Tolibon” ayollarning ta’lim olish, ishlash huquqini to‘xtatgani tanqidlarga sabab bo‘lmoqda. Ayrim afg‘on manbalari bu qarorga “Tolibon”ning aksar rasmiylari ham qarshiligini bildirgan.
Ayni paytda “Tolibon” yetakchisi mulla Haybatulla Oxundzoda ayollarning ta’lim olishiga qo‘yilgan taqiqning bekor qilinishi yuzasidan “Haqqoniy tarmog‘i” guruhi asoschisining o‘g‘li Sirojiddin Haqqoniy va “Tolibon” asoschilaridan birining o‘g‘li Mulla Yoqub bilan uchrashishdan bosh tortgan.
Yevroittifoq “Tolibon”ning taqiqi insoniyatga qarshi jinoyat ekanini e’lon qilgan. Qator davlatlar bundan norozilik bildirgan. “Tolibon” ayollarning universitetda tahsil olishiga qo‘yilgan taqiq sababi talaba qizlarning hijob o‘ramagani ekanini aytgan.
Afg‘onistonda ayollarning shifoxonaga yolg‘iz borishi mumkin emas. Bundan tashqari, ayollarga SIM-karta sotib olish ham taqiqlangan. Ma’lum jinoyatlar uchun ayollarni omma oldida qamchilash boshlangan.
