Birlashgan Millatlar Tashkilotining (BMT) taraqqiyot dasturi rahbari Achim Shtayner tashkilot Afg‘onistondan chiqib ketishi mumkinligini aytdi. Bu haqda “Daryo”ning Afg‘onistondagi muxbiri xabar berdi.
Shtaynerning aytishicha, agar “Tolibon” ayollarning BMT bilan ishlashiga qo‘yilgan taqiqni bekor qilmasa, UNAMA Afg‘onistonni tark etadi. Tashkilot rasmiysi “Tolibon” ayollarga ayrim sohalarda ishlashga ruxsat bergan bo‘lsa-da, Afg‘onistonga ko‘proq ayol ishchilar kerakligini ta’kidladi.
“Tolibon” Afg‘onistonda ayollarning faoliyatiga cheklovlar qo‘yishdan tashqari, shu oyda ayollarga BMT bo‘limlarida ishlashni ham taqiqlagan.
“Tolibon”: Afg‘onistonda BMT faoliyatiga hech qanday to‘siq yo‘q
“Tolibon” harakati BMTning Afg‘onistondagi mahalliy ayol xodimalariga ishlashni taqiqlagan. BMT bosh kotibining matbuot kotibi Stefan Dyujarrik taqiqni “nomaqbul va tushunarsiz” deb atagan va bu gumanitar tashkilotlarning ko‘makka muhtoj odamlarga yordam berishga putur yetkazishi mumkinligini ta’kidlagan.
“Afg‘on ayollarining BMTda ishlashini taqiqlash qarori ichki masala bo‘lib, buni barcha tomonlar hurmat qilishi kerak. Bu qaror Afg‘onistonda diskriminatsiya borligini yoki BMT faoliyati bloklanganini anglatmaydi. Aksincha, barcha yurtdoshlarimizning diniy va madaniy manfaatlarini inobatga olgan holda barcha huquqlarini himoya qilish tarafdorimiz”, — degan “Tolibon” matbuot kotibi Zabihulloh Mujohid.
2022-yil dekabr oyida “Tolibon” ayollarga nodavlat tashkilotlarda ishlashni taqiqlagandi. Ommaviy xalqaro noroziliklardan so‘ng, hech bo‘lmaganda sog‘liqni saqlash sohasida taqiq yengillashtirildi. Shu bilan birga, taqiq BMT idoralariga taalluqli emas edi.
2021-yil avgustida hokimiyatga kelganidan beri “Tolibon” Afg‘onistonda ayollarga nisbatan bir qator diskriminatsiya cheklovlarini qo‘ygan. Bundan tashqari, musiqa, ijtimoiy tarmoqlar va video o‘yinlar qonundan tashqari deb topilgan.
Izoh (0)