“Tolibon” harakati Afg‘onistonning Balx viloyatida davlat va xususiy shifoxonalar hamda boshqa sog‘liqni saqlash markazlarida ishlaydigan erkaklarga ayol bemorlarni, ayol shifokorlarga esa erkak bemorlarga xizmat qilmaslikni buyurdi. Bu haqda Hasht-e Subh Daily xabar berdi.
“Tolibon” talabiga ko‘ra, erkak va ayol tibbiyot xodimlarining ish joylari ajratilishi kerak. Erkak shifokorlar faqat erkaklarga, ayol shifokorlar esa ayollargagina xizmat qilishi zarur. Erkaklarga shifoxonadagi bemor ayollar uchun ajratilgan xonalarga kirish qat’iyan man etiladi.
Bungacha “Tolibon” ayollarga shifoxonalarga erkak hamrohlarsiz yolg‘iz borishini taqiqlagandi. Afg‘onistonda ayollarga bir qator taqiqlarni joriy qilingan. Xususan, ularga SIM karta sotib olish, istirohat bog‘iga tashrif buyurish taqiqlanadi.
“Tolibon” harakati universitet va o‘rta maktablarni ayollar uchun yopgan. Ularga nodavlat tashkilotlarida ishlashga ham taqiq qo‘yilgan. Ayollarga ta‘lim olish va ishlash huquqini taqiqlagan bo‘lsa-da, Afg‘oniston bosh vaziri o‘rinbosari Abdul G‘ani Barodar fuqarolardan o‘z huquqlariga ega chiqishni talab qilgan. “Tolibon” rasmiysi ayollar uchun universitet va maktablar mart oyidan qayta ochilishini aytgan.
