AQSH ma’muriyati “Tolibon” bilan “Al-Qoida” terrorchilik tashkilotining o‘ldirilgan rahbari Usama bin Ladenning izdoshi ekani aytilayotgan shaxsni Afg‘onistonda hibsda saqlanayotgan uch nafar Amerika fuqarosiga almashtirish bo‘yicha muzokaralar olib bormoqda. Bu haqda The Wall Street Journal (WSJ) nashri xabar berdi.
Nashr ma’lumotlariga ko‘ra, gap AQSHning Guantanamo qamoqxonasida saqlanayotgan yuqori martabali terrorchi Muhammad Rahim al-Afg‘oniy haqida ketmoqda. Taxminlarga ko‘ra, al-Afg‘oniy bin Ladenning yuqori lavozimli yordamchisi bo‘lgan. Bayden ma’muriyati 14-noyabr kuni toliblarga ushbu shaxsni 2022-yildan beri Afg‘onistondagi qamoqxonada saqlanayotgan AQSH fuqarolari Jorj Glezman, Rayan Korbett va Mahmud Habibiyga almashtirishni taklif etgan.
WSJ’ning aniqlik kiritishicha, AQSHning amaldagi prezidenti Jo Bayden hali bunday ayirboshlash bo‘yicha qaror qabul qilmagan. Shu bilan birga, AQSH Kongressi Vakillar palatasining respublikachi a’zosi Maykl Makkol bunday kelishuvni foydali emas deb baholagan.
“Amerika rahbari toliblarga shunday yuqori martabali shaxsni topshirish orqali tanqidga uchrashi mumkin”, deyiladi xabarda.
The Sun nashri avvalroq Bayden Guantanamodan Yamanlik 11 kishini ozod qilgani, ulardan ikkitasi bin Ladenning shaxsiy qo‘riqchilari ekani haqida xabar bergan edi. Ulardan biri Moat Hamza Ahmad al-Alviy ekstremistik qarashlarga amal qilishda davom etmoqda. Ikkinchisi, Suhayl Abdul Anom al-Sharabiy 2001-yil 11-sentyabr voqealariga aloqadorligi aytilmoqda.
WSJ xabariga ko‘ra, muzokaralar iyul oyidan beri davom etmoqda. Ushbu ma’lumot 2024-yilning dekabr oyida Oq uyning milliy xavfsizlik bo‘yicha maslahatchisi Jeyk Sallivan ishtirokida o‘tkazilgan maxfiy brifingida qatnashgan manbalar tomonidan tasdiqlangan.
23-dekabr kuni Bayden o‘lim jazosiga hukm qilingan 37 nafar AQSH fuqarosini afv etgan edi. Ularga tayinlangan oliy jazo muddatidan ilgari ozod qilish imkoniyatisiz umrbod qamoq jazosi bilan almashtirilgan. Oq uyning ushbu voqea haqidagi bayonotida AQSHning amaldagi prezidenti o‘lim jazosiga qarshi ekanligi aytilgan.
AQSHning saylangan prezidenti respublikachi Donald Tramp o‘sha kuniyoq Baydenning qarorini qattiq tanqid qildi. U ushbu mahbuslar qotillik uchun o‘lim jazosiga hukm qilinganini va ularning afv etilishi qurbonlarning xotirasiga hurmatsizlik ekanligini ta’kidladi.
Izoh (0)