Afg‘onistonning ichki ishlar vaziri vazifasini bajaruvchi Sirojiddin Haqqoniy mamlakat shariat qonunlariga va islomiy tamoyillarga zid bo‘lmagan davlatlar bilan munosabatlar o‘rnatishni xohlashini aytdi. Bu haqda Ariana News xabar berdi.
Haqqoniy Afg‘oniston hukumati dunyo bilan hamkorlikka emas, balki mustamlakachilikka qarshi ekanini ta’kidladi. U “Tolibon” hech kimga mamlakatdagi diniy qonunlarni buzishga yo‘l qo‘ymasligini bildirdi.
Agar biz munosabatlar va hamkorlikni istasak, bu tamoyillarga asoslangan bo‘lishi kerak. Dunyo o‘zaro hamkorlik qilayotganidek, biz ham ushbu muloqotning bir qismi bo‘lishni xohlaymiz, chunki manfaatlarimiz va ehtiyojlarimiz savdo hamda boshqa masalalarga bog‘liq, dedi Haqqoniy.
“Odamlar siyosat haqida gapirish o‘rniga ibodat qilishi kerak” — Haqqoniy
Fevral oyida Sirojiddin Haqqoniy odamlar siyosat haqida gapirish o‘rniga “ibodat” qilishlari kerakligini aytgandi.
Erkak va ayollar siyosat borasida shunday bo‘lishi kerak edi va shunday bo‘ladi, deb gapirmoqda. Bu haqda ko‘p o‘ylamang, Allohga ko‘proq sajda qiling, shu yaxshisi, degan u.
U o‘zlarining siyosatini himoya qilib, Afg‘oniston muvaqqat hukumatining rejimi savdolashilmasligini ta’kidlagan. Shuningdek, ichki ishlar vaziri “Tolibon” jahon hamjamiyatining ko‘rsatmalariga amal qilishni istamagani uchun sanksiyalar ostidaligini aytgan. Haqqoniy afg‘onlar erkinlikka o‘zi erishgani va kimningdir oldida qarzdor emasligini ta’kidlagandi.
Izoh (0)