Afg‘onistonda “Tolibon” talabiga ko‘ra, do‘konlardagi manekenlarning yuzlari paket va matolar bilan yopib qo‘yilmoqda. Bu haqda Associated Press xabar berdi.
Qayd etilishicha, Kobuldagi kiyim-kechak sotuvchilari “Tolibon” hukumatining ezgulikni targ‘ib qilish va illatlarning oldini olish vazirligi ko‘rsatmalariga muvofiq, manekenlarning boshlarini mato qopchalar, qora polietilen paketlar va folga bilan o‘rashga majbur bo‘lgan. Shu bilan birga, avval “Tolibon” manekenlarning boshini olib tashlashni talab qilgandi. Ular islom qoidalarida inson qiyofasini tasvirlash taqiqlanganiga asoslanib, manekenlarga butlar sifatida sig‘inish mumkinligidan “xavotir bildirgan”.
“Hamma biladiki, manekenlar butlar emas va hech kim ularga sig‘inmaydi. Barcha musulmon mamlakatlarida ular kiyim-kechaklarni namoyish qilish uchun ishlatiladi ”, — deydi o‘z navbatida mahalliy do‘konlardan birining egasi.
Dekabr oyida BMTning Inson huquqlari bo‘yicha Oliy komissari Volker Turk Afg‘onistonning xalqaro majburiyatlarini eslatib, “Tolibon” ayollar huquqlarini cheklovchi barcha qonunlarni zudlik bilan bekor qilishi kerakligini aytgandi.
Afg‘oniston muvaqqat hukumati ayollarga turli taqiqlar joriy qilmoqda. Jumladan, ayollarga mahramsiz shifokorga borishi mumkin emas. Yangi taqiqda ayollarning erkak shifokorlarga borishi ham taqiqlanadi.
Bundan tashqari “Tolibon” harakati universitet va o‘rta maktablarni ayollar uchun yopgan. Ularga nodavlat tashkilotlarida ishlashga ham taqiq qo‘yilgan. Ayollarga ta’lim olish va ishlash huquqini taqiqlagan bo‘lsa-da, Afg‘oniston bosh vaziri o‘rinbosari Abdul G‘ani Barodar fuqarolardan o‘z huquqlariga ega chiqishni talab qilgan. “Tolibon” rasmiysi ayollar uchun universitet va maktablar mart oyidan qayta ochilishini aytgan.
Izoh (0)