Afg‘onistonning amaldagi hukumati oltinchi va undan pastki sinflarda o‘qiydigan qizlarga maktabda ta’limni davom ettirish uchun ruxsat berdi. Bu haqda Tolo News mamlakat Ta’lim vazirligi xatiga tayanib xabar berdi.
Maktubda aytilishicha, “pastki sinflarda o‘quvchi qizlar maktab va kurslarda tahsil olishni davom ettirishi mumkin”.
Shuningdek, boshlang‘ich maktablarda ishlagan va dekabr oxirida ishdan chetlatilgan o‘qituvchi ayollarning ham ishlashiga ruxsat beriladi. Qizlar uchun o‘qishni davom ettirish shartlaridan biri “o‘quvchi va o‘qituvchilarning shariat qoidalariga muvofiq majburiy hijob o‘rashi” hisoblanadi.
“Tolibon” a’zolarining o‘zlari ushbu hujjat mazmunini izohlaganicha yo‘q.
Shu bilan birga, Afg‘onistonda oliy ta’lim vaziri vazifasini bajaruvchi Neda Muhammad Nadim BMTning Afg‘oniston bo‘yicha maxsus vakili Markus Potsel bilan uchrashuvda Islom Amirligi ayollarning ta’lim olishini to‘liq taqiqlash haqida qaror qabul qilmagani, ammo tashqi omillar tufayli bu masalani keyinga surganini aytgan.
Nadim ular bosim o‘tkazilishi tufayli kimningdir talabini qabul qilmasligini qo‘shib qo‘ydi.
“Vazir aytdiki, biz shariat doirasida butun afg‘on xalqi huquqlariga rioya qilinishi tarafdorimiz va ta’lim sohasida butun dunyo bilan yaxshi aloqada bo‘lishni xohlaymiz. Biz xalqaro hamjamiyatdan bizga shariatga zid so‘rovlar bilan murojaat qilmasliklarini so‘raymiz”, — dedi vazirlik vakili Ziyoullo Hoshimiy.
Avvalroq “Tolibon” harakati rasmiysi ayollarga universitet va o‘rta maktablar mart oyidan boshlab qayta ochilishini ma’lum qilgan edi.
Afg‘onistonda “Tolibon” harakati universitet va o‘rta maktablarni ayollar uchun yopgan. Ularga nodavlat tashkilotlarida ishlashga ham taqiq qo‘yilgan. Ayollarga ta‘lim olish va ishlash huquqini taqiqlagan bo‘lsa-da, Afg‘oniston bosh vaziri o‘rinbosari Abdul G‘ani Barodar fuqarolardan o‘z huquqlariga ega chiqishni talab qilgan.
Yevroittifoq “Tolibon”ning taqiqi insoniyatga qarshi jinoyat ekanini e’lon qilgan. Qator davlatlar bundan norozilik bildirgan. “Tolibon” ayollarning universitetda tahsil olishiga qo‘yilgan taqiq sababi talaba qizlarning hijob o‘ramagani ekanini aytgan.
Afg‘onistonda ayollarning shifoxonaga yolg‘iz borishi mumkin emas. Bundan tashqari, ayollarga SIM-karta sotib olish ham taqiqlangan. Ma’lum jinoyatlar uchun ayollarni omma oldida qamchilash boshlangan.
Izoh (0)