Surxondaryodagi O‘zbekiston va Afg‘oniston qo‘shma bozoridan reportaj

Surxondaryo viloyatida 120 gektar yerda qurilgan O‘zbekiston va Afg‘oniston qo‘shma bozori afg‘on va o‘zbek xalqining e’tiboridagi maskanlardan biri bo‘lib turibdi.

 “Daryo” muxbiri ushbu bozorga borib, to‘liqroq ma’lumot olish maqsadida do‘kondorlar, xaridorlar va tashrif buyuruvchilar bilan suhbatlashdi.

Afg‘oniston va O‘zbekiston o‘rtasidagi qo‘shma bozorda ikki davlat fuqarolari uchun mehmonxonalar, shifoxonalar, restoranlar va boshqa qulayliklar yaratilgan bo‘lib, bu yerga afg‘on sarmoyadorlari ham sarmoya kiritishlari mumkin.

Ma’lum qilinishicha, bu bozorda 500 do‘kon bor va o‘nlab afg‘onlar bu yerda tadbirkorlik bilan shug‘ullanmoqda. Afg‘oniston fuqarolari mazkur bozor hududiga vizasiz kelib, zarurat tug‘ilganda 15 kungacha shu bozor mehmonxonalarida qolib, tadbirkorlik bilan shug‘ullanishi mumkin.

Biroq “Tolibon” hukumati qo‘shma bozorga borish niyatida bo‘lgan afg‘on ayollariga cheklovlar joriy qilgan.

 40 yoshdan oshgan ayollar qo‘shma bozorga kirishi mumkin, 40 yoshgacha bo‘lgan ayollar esa bozor kasalxonasida davolanish uchun zarur hujjatlarga ega bo‘lmasa, bozorga kiritilmaydi.

Afg‘onistonlik do‘kondorlar ushbu bozorning tashkil etilishini ikki mamlakat xalqining iqtisodiy o‘sishi va rivojlanishida foydali deb hisoblaydilar.

Navidulla Mozori Sharif shahrida do‘kondor bo‘lib, otasi bilan qo‘shma bozorga tuxum va yog‘ sotib olish uchun kelgan. Uning aytishicha, bu bozordagi mahsulotlar Mozori Sharif bozoridan biroz qimmatroq.

Shu bilan birga, bir qator afg‘on tadbirkorlari ushbu bozorning barpo etilishi mamlakat iqtisodiyoti yuksalishi uchun juda muhim deb hisoblamoqda.

Tadbirkor Muhammad Latifning aytishicha, bu bozorning tashkil etilishi ikki davlat uchun ham foydali, ikki davlat tadbirkorlarining biznesi yuksaladi, bu bozor tashkil etilishi bilan ikki qo‘shni davlat o‘rtasidagi munosabatlar ham yaxshilanadi.

Bu yerni tomosha qilish uchun kelgan Muhammad Sardor qo‘shma bozor tashkil etilganidan juda xursand ekanini aytdi.

“Bu qo‘shni davlatlar o‘rtasidagi yaxshi munosabatlardan dalolat beradi va biz bu munosabatlarni rivojlantirishga harakat qilishimiz kerak, chunki bu bozor ikki davlat savdogarlari uchun ham foydalidir”, dedi u.

 Aytish joizki, qo‘shma bozorga kirgan afg‘onlarga bu bozorda AQSH dollaridan foydalanish taqiqlangan.

Faqatgina Afg‘oniston va O‘zbekiston milliy valyutasi bilan mahsulotlarni sotib olish mumkin.