Afg‘oniston hududida TAPI magistral gaz quvuri qurilishi boshlandi. Bu haqda “Tolibon” rasmiy vakili Zabihulloh Mujohid Ariana News nashriga ma’lum qildi.
Mujohidning so‘zlariga ko‘ra, loyihani amalga oshirish uchun zarur bo‘lgan texnik jihozlar Afg‘oniston va Turkmaniston o‘rtasidagi chegara zonasiga yetkazilgan, amaliy ishlar boshlangan.
Ushbu loyihaning turli bo‘limlari ustida ko‘p sonli mutaxassislar ishlamoqda va uning birinchi bosqichi kelgusi ikki yil ichida yakunlanadi, deya ma’lum qildi Mujohid.
Ta’kidlanishicha, tez orada CASA-1000 – Markaziy Osiyo —Janubiy Osiyo mintaqaviy elektr uzatish liniyasi loyihasini amalga oshirish bo‘yicha amaliy ishlar boshlanadi.
Afg‘oniston asta-sekin mustahkamlanib, mamlakat fuqarolariga yaxshi ish o‘rinlarini taqdim etadi, dedi Mujohid.
Mutaxassislar TAPI mamlakat iqtisodiyotini rivojlantirishda muhim rol o‘ynaydi, deb hisoblaydi. Xususan, u qurib bitkazilgach, 12 ming kishi ish bilan ta’minlanadi, Afg‘onistonning yillik daromadi esa 1 milliard dollarga oshadi.
TAPI
Turkmaniston — Afg‘oniston — Pokiston — Hindiston gaz quvurini qurish loyihasi hisoblanadi. Uning uzunligi 1840 kilometrni tashkil etadi. Yiliga 33 milliard kub metr tabiiy gaz o‘tkazish quvvatiga ega TAPI gaz quvurining qurilishi 2015-yilda boshlangan.
Loyihaga ko‘ra, Turkmaniston gazini Afg‘oniston orqali Pokiston va Hindiston bozorlariga yetkazib beriladi. Turkmaniston hududida 214 kilometr uzunlikdagi uchastkaning qurilishi allaqachon yakunlangan. Navbat — Afg‘oniston orqali quvurlar o‘tkazishda. Loyihaning umumiy qiymati 10 milliard dollarga baholanmoqda.
“Tolibon” gaz tranzitidan yiliga 450 million dollar daromad olishni mo‘ljallayapti. Bunday prognozni Afg‘oniston tashqi ishlar vaziri vazifasini bajaruvchi Amir Xon Muttaqiy e’lon qilgan. U Afg‘oniston o‘z hududi orqali resurslarni tashish uchun to‘lanadigan foyda bilan bir qatorda yiliga 5 milliard kub metr gaz ham olishini aytgan.
Izoh (0)