Аnor qadimdanoq Sharqda barcha mevalarning shohi hisoblangan. U Afg‘onistonning ko‘plab viloyatlarida, jumladan, Qandahor, Hilmand, Paktika, Kapisa va Kobulda yetishtiriladi. Hosilning ko‘pligi tufayli meva narxi keskin arzonlashgan. Bu bir tarafdan xaridorlarni xursand qilsa-da, boshqa tomondan savdogarlar noroziligiga sabab bo‘lmoqda. “Daryo”ning Afg‘onistondagi muxbiri sotuvchilar bilan suhbatlashib, anorning arzonligi sabablarini o‘rgandi.
Mozori Sharifdagi anor sotuvchilarning aytishicha, bu yil meva misli ko‘rilmagan darajada arzonlashgan. Afg‘oniston bozorida eng yaxshi anorning bir kilosi 40 afg‘oniga (salkam 7,500 so‘m) sotilmoqda, bunday anorlar asosan Qandahorda yetishtiriladi.
Meva narxining arzonlashishi sababi
2024-yil Afg‘onistonda o‘tgan yillarga nisbatan anor hosili yaxshi bo‘ldi. Meva qo‘shni davlatlarga eksport qilinayotgani dehqonlar uchun yetarli emas. Ular o‘z mahsulotlarini bozorga ham olib chiqib sotmoqda. Bu esa anor narxining arzonlashishiga sabab bo‘lmoqda.
Mozori Sharif bozorida bir kilogramm anorning narxi 20 afg‘onidan (3 ming 700 so‘mdan ortiq) boshlanadi. Oktyabr oyida “Tolibon” Sanoat va savdo vazirligi Qozog‘istonga 32 tonna Qandahor anori eksport qilinishini ma’lum qildi. Pokistonning afg‘on mevasiga bojxona tarifini oshirishi anor eksportini qiyinlashtirmoqda.
Qandahorlik dehqonlar issiq havo tufayli anor mahsulotlarining bir qismi sifati buzilganini aytgan. Ular 4 kilogram anorni 30 afg‘onidan (5600 so‘m) sotgan holatlar bo‘lgan.
Hozirga qadar Qandahorda qiymati 13 million dollardan ortiq 22 ming 500 tonna anor eksport qilingan. Bozorlarda bir stakan anor sharbati esa 50 afg‘oniga (9300 so‘m) sotiladi. Qandahar va Tag‘ob anori juda shirin, narxi ham nisbatan qimmat.
Izoh (0)