Afg‘onistondagi o‘quvchi qizlar 11—12-yanvar kunlari o‘tkazilishi rejalashtirilgan Islom hamkorlik tashkiloti (IHT) yig‘ilishi ishtirokchilarini mamlakatda qizlarning ta’lim olish sharoitlarini yengillatishga chaqirdi.
“Islom hamkorlik tashkilotiga qizlar maktablari masalasini muhokamaga kiritish va bu masala bo‘yicha jiddiy qaror qabul qilishni so‘rab murojaat qilmoqdamiz”, dedi Nabina ismli talaba TOLOnews telekanaliga.
Talabalardan biri “Islom Amirligidan ushbu talablarni tinglashini va maktab va universitetlarning eshiklarini ayollar uchun imkon qadar tezroq ochishni so‘rashini” aytgan.
IHT joriy oyning 11 va 12-kunlari Pokistonda yig‘ilish o‘tkazib, islomda qizlarning ta’lim olishi masalasini muhokama qiladi.
Afg‘onistonning ushbu yig‘ilishda ishtirok etishi hozircha aniq emas.
“Islom Amirligi hukumati ham, oldida barcha eshiklar yopiq bo‘lgan ayollar ham Islomoboddagi islom tamoyillariga muvofiq o‘z talablarini taqdim etishi uchun mazkur uchrashuvga taklif etilishi kerak”, deydi ayollar huquqlari faoli Tafsir Siyahpush.
Pokiston Tashqi ishlar vazirligi ushbu global yig‘ilishdan maqsad butun dunyodagi musulmon jamoalarda qizlarning ta’limini rivojlantirish uchun muammolar va imkoniyatlarni hal qilish ekanligini e’lon qildi.
Vazirlik bayonotida tadbirda 44 ta musulmon va do‘st davlatdan vazirlar, elchilar, olimlar va akademik doiralar, UNESCO, UNICEF va Jahon banki kabi xalqaro tashkilotlar vakillaridan iborat 150 dan ortiq xalqaro arboblar ishtirok etishi aytilgan.
“Afg‘on xalqi muhokama qilinadigan har qanday yig‘ilishda Afg‘oniston Islom Amirligi vakili bo‘lishi kerak”, deydi siyosiy masalalar bo‘yicha ekspert Salim Paigir.
Afg‘oniston tomoni hozircha IHT yig‘ilishidagi ishtiroki bo‘yicha hech qanday izoh bermagan.
Ushbu uchrashuv mamlakatda qizlar uchun maktablar yopilganidan 1200 kun, universitetlar yopilganidan 750 kundan ortiq vaqt o‘tgach bo‘lib o‘tadi.
Izoh (0)