“Bizga hayvonlardan yomonroq munosabatda bo‘lishadi” — Afg‘onistonlik qiz “Tolibon”ning cheklovlari haqida (video)

Afg‘onistonda “Tolibon” taqiqi sabab universitetda o‘qishdan mahrum bo‘lgan 19 yashar qiz BBC’ga o‘z kechinmalarini aytib berdi.

“Peshonamiz shunchalik sho‘r bo‘lar ekan, Alloh ayollarni yaratmagani yaxshi edi. Shunda umuman yashamasdik ham. Bizga hayvonlardan ko‘ra yomonroq munosabatda bo‘lishadi. Hayvonlarku o‘zi istagan joyga borishi mumkin, lekin biz qizlarning ostona hatlab chiqishga haqqimiz yo‘q”, — dedi afg‘onistonlik qiz BBC muxbiriga.

Afg‘onistonda “Tolibon” harakati universitet va o‘rta maktablarni ayollar uchun yopgan. Ularga nodavlat tashkilotlarida ishlashga ham taqiq qo‘yilgan. 

Yevroittifoq “Tolibon”ning taqiqi insoniyatga qarshi jinoyat ekanini e’lon qildi. Qator davlatlar ham o‘z noroziligini bildirdi. “Tolibon” ayollarning universitetda tahsil olishiga qo‘yilgan taqiq sababi sifatida talaba qizlarning hijob o‘ramaganini aytgan.

Dekabr oyida “Tolibon” harakati rasmiysi ayollarga universitet va o‘rta maktablar mart oyidan boshlab qayta ochilishini ma’lum qildi.

Afg‘onistonda ayollarning shifoxonaga yolg‘iz borishi mumkin emas. Bundan tashqari, ayollarga SIM-karta sotib olish ham taqiqlangan. Ma’lum jinoyatlar uchun ayollarni omma oldida qamchilash boshlangan.