Erondagi bir qator afg‘on muhojirlarining TOLOnews’ga ma’lum qilishicha, afg‘on fuqarolari qonuniy hujjatlarga ega bo‘lishlariga qaramay, so‘nggi kunlar va haftalarda Eron politsiyasi tomonidan hibsga olinib, deportatsiya qilinmoqda.
Erondagi afg‘on muhojirlari muvaqqat hukumatni o‘z muammolarini jiddiy hal qilishga chaqirdi.
“Eron politsiyasi hujjatlarimizni qadrlamaydi. Bir necha kun oldin o‘zimga kerak bo‘lgan narsani olgani chiqqanimda, ular meni hibsga olishdi”, dedi Erondagi afg‘on muhojiri Xolid Sultoniy.
Afg‘on muhojirlar oxirgi kunlarda ish joylariga cheklovlar, hibsga olishlar va deportatsiyalar har qachongidan ham ko‘payganini ta’kidlagan.
“Migrantlar duch keladigan muammolar mavjud. Qabul qiluvchi davlatning siyosati hujjatsiz muhojirlarni qaytarishga asoslangan, biroq mamlakatdagi ko‘p sonli qonuniy muhojirlar ham qiyinchiliklarga duch kelishmoqda”, deydi Erondagi yana bir afg‘on muhojiri.
“Tolibon” matbuot kotibi Zabihulloh Mujohidga ko‘ra, xorijdagi afg‘on muhojirlari muammolarga duch kelmasligi uchun harakat qilinmoqda. U mamlakatni noqonuniy tark etgan afg‘on muhojirlarini qaytishga chaqirishini yana bir bor ta’kidlagan.
“Islom Amirligi qo‘shni davlatlardagi muhojirlarimiz muammolarga duch kelmasligi uchun barcha sa’y-harakatlarni amalga oshirdi. Agar ular muammolarga duch kelsa, ularni ma’lum darajada hal qilishga harakat qilinadi. Ha, Erondagi muhojirlarimiz qiyinchiliklarga duch kelishdi va biz Eron rasmiylari bilan uchrashuvlar chog‘ida migrantlar bilan bog‘liq muammolarni jiddiy ko‘rib chiqdik. Bundan tashqari, biz hujjatsiz muhojirlarni o‘z yurtlariga qaytishga taklif qildik”, deydi Afg‘oniston hukumati matbuot kotibi.
Avvalroq Xalqaro Migratsiya Tashkiloti (XMT) so‘nggi hisobotida afg‘onlarning Afg‘onistonga qaytish darajasi o‘tgan haftada undan oldingi haftaga nisbatan uch foizga kamayganini qayd etgan edi.
Sentyabr oyida Eron mamlakatdagi noqonuniy muhojirlarini ommaviy deportatsiya qilish niyati haqida xabar berilgandi.
“Mamlakatda noqonuniy qochqinlarning mavjudligi nafaqat ijtimoiy zarar keltiradi, balki mahalliy aholining ish joylarini ham tortib oladi”, dedi Eron ichki ishlar vaziri Iskandar Momeyni.
Afg‘onistonliklarning qo‘shni Eronga ko‘chishi 2021-yil avgust oyida boshlangan. BMTning Qochqinlar agentligi hisob-kitobiga ko‘ra, Eronda 4,5 millionga yaqin afg‘on muhojirlari mavjud. Eron OAVga ko‘ra, mamlakatda jami 8 million afg‘on bo‘lib, ulardan 4 millioni noqonuniy muhojirlardir.
Eron va “Tolibon” hukumati bilan diplomatik aloqalarga ega, deportatsiya tartib-qoidalari bo‘yicha ikki tomonlama kelishuvlar mavjud. Maʼlum qilinishicha, 2024-yilning dastlabki olti oyida 400 ming Afg‘oniston fuqarosi Erondan mamlakatga qaytarilgan. Biroq tahlilchilar deportatsiya qilingan afg‘onlarning bir qismi yana Eronga qaytishini bashorat qilmoqda.
Izoh (0)