Afg‘onistonning “Tolibon” harakati vakili Zabihullo Mujohid G‘arb mamlakatlaridan ularning harbiylari tomonidan zarar ko‘rgan afg‘onlar foydasiga tovon to‘lashni talab qildi.
Mujohidning aytishicha, G‘arb davlatlari “o‘zlarining harbiy bosqini davrida zulm va jinoyatlarga duchor bo‘lgan” afg‘onlarga tovon to‘lashi shart. U “Tolibon” hukumatidagi tegishli idoralar Afg‘onistonda jabrlangan barcha fuqarolarning huquqlari himoya qilinishiga erishishini ta’kidladi.
Britaniya harbiylari tomonidan sodir etilgan jinoyatlar bo‘yicha tergovga izoh berar ekan, hukumat vakili “bosqinchi mamlakatlarning barcha harbiy jinoyatlari qasddan sodir etilgani”ni qayd etdi.
Afg‘onistondagi jangga yaroqli erkaklarni britaniyalik harbiylar tomonidan o‘ldirilishi
The Daily Telegraph nashri Buyuk Britaniyaning Maxsus havo desant xizmati (Special Air Service, SAS) bo‘linmalaridan birining harbiylari Afg‘onistondagi jangga yaroqli erkaklarni qasddan o‘ldirgan holatlar haqida ma’lumot bergandi.
Ushbu ma’lumotlar 2010—2013-yillarda Afg‘onistondagi urush paytida qirollik harbiy xizmatchilari tomonidan sodir etilgan taхminiy harbiy jinoyatlarni ommaviy tergov qilish jarayonida nomi oshkor etilmagan britaniyalik zobit tomonidan ma’lum qilingan.
Axborotchi ma’lumotlariga ko‘ra, SAS bo‘linmalaridan birining a’zolari barcha jangga yaroqli afg‘on erkaklarini, shuningdek, 16 yoshdan kichik o‘smirlarni, hatto ular xavf tug‘dirmasa ham, o‘ldirgan. Ta’kidlanishicha, shundan so‘ng harbiylar “o‘ldirilgan odam qurollangan bo‘lgan” degan taassurot uyg‘otish maqsadida jasadlar oldiga qurol qo‘yib ketishgan.
Ta’kidlanishicha, axborotchi bu taxmin qilinayotgan jinoyatlar haqida 2011-yil mart oyidagi qo‘shma mashg‘ulotlar paytida mazkur bo‘linmada xizmat qilgan SAS vakilidan xabar topgan. U bu haqda o‘z komandiriga aytgan, biroq komandir bu masalani bo‘linma boshlig‘i bilan muhokama qilmagan, chunki “bunday ayblovlar zamirida ushbu bo‘linma askarlariga nisbatan shaxsiy adovat yotgan bo‘lishi mumkin” deb o‘ylagan. Shu bilan birga, axborotchining komandiri ularning suhbatini yozma ravishda qayd etgan va keyinchalik maxsus kuchlar direktori bilan uchrashgan.
2023-yilda BBC o‘nlab odamlarning qatl etilgani haqida xabar berganidan so‘ng, Buyuk Britaniyada 2010—2013-yillarda Afg‘onistonda britaniyalik harbiylar tomonidan sodir etilgan harbiy jinoyatlar bo‘yicha ommaviy tergov boshlangan. Tergovning maqsadi Birlashgan Qirollik harbiy-siyosiy rahbariyati Afg‘onistonda 10 yildan ortiq vaqt davomida suddan tashqari qatl holatlarini yashirgan-yashirmaganini aniqlashdan iborat.
Tergovga Angliya va Uels apellyatsiya sudi sudyasi Charlz Xeddon-Keyv rahbarlik qilmoqda. The Daily Telegraph’ning aniqlik kiritishicha, ilgari harbiy prokuraturaning ikkita tergovida ham qirollik harbiy xizmatchilaridan hech biri javobgarlikka tortilmagan.
Izoh (0)