Афғонистоннинг “Толибон” ҳаракати қўшни Покистон томонидан ташкил этилган мусулмон оламида қизлар таълими бўйича глобал саммитда иштирок этмайди. Бу ҳақда Покистон таълим вазири Холид Мақбул Сиддиқий маълум қилди.
“Биз Афғонистонни таклиф қилдик, аммо афғон ҳукуматидан ҳеч ким конференцияга келмади”, деди Сиддиқий.
Исломободда 11 январь куни “Мусулмон жамоаларида қизларнинг таълими: муаммолар ва имкониятлар” мавзусида икки кунлик халқаро конференцияга старт берилди. Унда 47 мамлакатдан 150 га яқин вакил иштирок этмоқда. Иштирокчилар орасида тинчлик бўйича Нобель мукофоти совриндори Малала Юсуфзай ҳам бор.
“Мен барча қизларнинг мактабга бориш ҳуқуқини ҳимоя қилиш ҳамда раҳбарлар нима учун “Толибон”ни афғон аёлларига қарши жиноятлари учун жавобгарликка тортишлари кераклиги ҳақида гапираман”, деб ёзди у Х ижтимоий тармоғида.
Декабрь ойи бошида афғон аёлларига олий ва ўрта тиббий таълим муассасаларида ўқиш тақиқланди. Яқин вақтгача ушбу муассасалар мамлакат аёллари учун олий таълим олишнинг ягона имконияти бўлиб келган, чунки 2022 йил декабрь ойида Толибон Афғонистон аёлларининг университетларга киришига тўсқинлик қилган эди.
“Толибон” ҳокимият тепасига келгач, мамлакатда бир қатор тақиқ ва чекловларни, биринчи навбатда, аёлларга нисбатан жорий эта бошлаган эди.
Афғонистонда аёлларга нисбатан жорий қилинган тақиқлар қуйидагилар:
- афғонистонлик аёлларнинг БМТ идораларида ишлаши;
- эркакларга аёллар учун кийим тикиш;
- аёлларнинг эркак шифокорларга бориши;
- аёлларнинг шифохонага ёлғиз бориши;
- аёлларнинг истироҳат боғига ташриф буюриши,
- оилалар ва аёлларнинг боғлари ёки яшил ҳудудлари бўлган ресторанларга кириши,
- аёллар овози эшитилган рекламаларни эфирга узатиш,
- аёлларнинг сотувчилари билан савдолашиш,
- акушер ва ҳамшираликка ўқиш,
- аёлларга бир-бири билан гаплашиш тақиқланган.
Афғонистон олий таълим вазири Неда Муҳаммад Надим қизларнинг дунёвий олий ўқув юртларида таълим олиши ислом қонунларини бузиши ва ислом анъаналарига зид эканлигини айтди.
Изоҳ (0)