Xitoy Buyuk Britaniya, Fransiya va Germaniyaning BMT Xavfsizlik Kengashining Eronga nisbatan yadro dasturi tufayli “zudlik bilan sanksiyalar” mexanizmini ishga tushirish urinishlariga qat’iy qarshi ekanligini bildirdi. Bu haqda Xitoy Tashqi ishlar vazirligi vakili Lin Szyan ma’lum qilgan.
Vazirlik vakili ta’kidlashicha, Pekin doimo Eron yadro muammosini tinch va diplomatik yo‘l bilan hal etishni yoqlab kelgan. Uning aytishicha, sanksiyalar kiritish tomonlar o‘rtasidagi ishonchni mustahkamlashga va kelishmovchiliklarni bartaraf etishga yordam bermaydi, aksincha, muzokaralarni qayta boshlash bo‘yicha diplomatik sa’y-harakatlarni sekinlashtiradi.
“Hozirgi vaziyatda Xavfsizlik kengashining har qanday harakati yangi kelishuv bo‘yicha muzokaralarga ko‘maklashishi lozim, bunga to‘sqinlik qilmasligi kerak”, dedi diplomat.
Financial Times gazetasining xabar berishicha, 13-avgust kuni Buyuk Britaniya, Germaniya va Fransiya BMT bosh kotibi Antoniu Guterrishga maktub yo‘llagan. Unda agar Tehron o‘z yadro dasturi bo‘yicha muzokaralarni qayta boshlamasa, Eronga qarshi sanksiyalarni tiklashga tayyor ekanliklarini ma’lum qilingan
Maktubni Germaniya tashqi ishlar vaziri Yohann Vadefull, Fransiya tashqi ishlar vaziri Jan-Noel Barro va Buyuk Britaniya tashqi ishlar vaziri Devid Lemmi imzolagan. Tashqi ishlar vazirlari, Eron muzokaralarga qaytishdan bosh tortgan taqdirda “zudlik bilan” sanksiyalar qo‘llanishi mumkinligidan ogohlantirgan. Shuningdek, “Yevropa uchligi” (Ye3) vazirlari Tehronga avgust oyi oxirida sanksiyalarning avtomatik ravishda qayta joriy etilishining oldini olish uchun muhlat berishni taklif qilgan.
“Agar Eron 2025 yil avgust oyi oxirigacha diplomatik yechimga erishishni xohlamasa yoki muddatni uzaytirish imkoniyatidan foydalanmasa, Ye3 davlatlari sanksiyalarni qayta joriy etish mexanizmini ishga tushirishga tayyor ekanligimizni aniq bildirdik”, deyiladi maktubda.
Izoh (0)