Afg‘onistonda “Tolibon” hukumati ayollarning istirohat bog‘lariga tashrif buyurishini taqiqlab qo‘ydi, deb yozadi Deutsche Welle.
Afg‘oniston “axloq politsiyasi” mamlakatdagi barcha istirohat bog‘lariga ayollarni kiritmaslikni buyurdi. Bu taqiq afg‘on ayollari uchun allaqachondan buyon amal qilib kelayotgan boshqa bir qator cheklovlar qatoriga qo‘shildi.
Ezgulikni targ‘ib qilish va illatlarning oldini olish vazirligi vakili ayollarning istirohat bog‘lariga borishiga ruxsat berilmasligini tasdiqladi. Mamlakatda bog‘lar bo‘yicha ikkita operator toliblar ularga ayollarni kiritmaslikni buyurganini ma’lum qildi.
Ta’kidlanishicha, ezgulik vazirligining bundan avvalroq joriy etilgan qoidalariga muvofiq, bog‘lar erkaklar va ayollar tashrif buyurishi uchun alohida-alohida qismlarga bo‘lingan yoki ayollar uchun ba’zi kunlar ajratib qo‘yilgan. Bu qoida umuman olganda barcha jamoat bog‘lari, shu jumladan, ochiq maydonlar hamda jamoat hammomlari uchun ham amal qilgan.
“Tolibon” hukumati ayollarning ishlash va o‘qish huquqlarini cheklab qo‘ygan. Qizlarning maktablarga borishiga va ayollarning ishlashiga ruxsat berilmaydi. Shu bilan birgalikda, qonunlarga ko‘ra, ayollar ko‘chada yuzlarini to‘liq yopishlari kerak va erkaksiz uydan chiqishga haqli emaslar.
Hozircha dunyoning hech bir davlati “Tolibon” hukumatini tan olmagan.
Xalqaro hamjamiyatning “Tolibon”ni tan olish sharti mamlakatda inklyuziv hukumatni shakllantirish, shuningdek, ayollar va qizlarning asosiy huquq va erkinliklarini ta’minlashdan iborat bo‘ladi.
Izoh (0)