Afg‘onistonda “Tolibon” hukumati mamlakatdagi barcha nodavlat tashkilotlarga ayollarning u yerga ishga borishini taqiqlashni buyurdi, deb xabar bermoqda Reuters agentligi.
Associated Press taqiqni boshqacharoq ta’riflamoqda: agentlik ma’lumotlariga ko‘ra, nohukumat tashkilotlardan ayollarni ishga olishni to‘xtatish talab qilingan.
Hukumat taqiqni bunday tashkilotlarning ayrim xodimlari musulmonlarga xos kiyinmasligi bilan izohladi.
Birlashgan Millatlar Tashkiloti taqiq haqidagi xabarlardan “chuqur xavotir” bildirdi va bu chorani qoraladi.
“Afg‘onistondagi BMT va uning hamkorlari shuni eslatib o‘tadiki, mamlakatning amaldagi hukmdorlariga ayollarni o‘z taqdirini o‘zi hal qilish vakolatidan mahrum qilish, ularni huquqlaridan mahrum qilish, ijtimoiy-siyosiy hayotning barcha jabhalaridan tizimli ravishda chetlashtirish mamlakatni orqaga tortib, har qanday muhim tinchlik va barqarorlik yo‘lidagi sa’y-harakatlarni puchga chiqarmoqda”, — deyiladi bayonotda.
20-dekabr kuni “Tolibon” qizlarning universitetlarda ta’lim olishini taqiqlab qo‘ygandi. Bu qancha muddat davom etishi noma’lum. AQSH va Qatar bu qarorni qayta ko‘rib chiqishni talab qildi. BMT ayollarning OTMlarga qo‘yilmasligi xalqaro huquqning buzilishi deb hisoblaydi.
24-dekabr kuni g‘arbiy Hirot shahrida bir necha o‘nlab ayollar universitetlarda o‘qish taqiqlanishiga qarshi namoyishga chiqdi; xavfsizlik kuchlari ularga qarshi suv sepish mashinalaridan foydalandi.
https://twitter.com/NasimiShabnam/status/1606626868567937024
Izoh (0)