AQSHning saylangan prezidenti Donald Trampning jamoasi Afg‘onistondan qo‘shinlarni olib chiqishda ishtirok etgan amaldagi va sobiq yuqori martabali harbiylar ro‘yxatini tuzmoqda, ularni javobgarlikka tortish imkoniyatini o‘rganmoqda. Bu haqda manbalarga tayanib, NBC News xabar berdi.
Manbalardan biri Amerika qo‘shinlarining 2021-yil Afg‘onistondan olib chiqilishi, xususan, ushbu qarorda ishtirok etganlar haqida ma’lumot to‘plash uchun komissiya tuzish rejalari borligini aytdi. Ushbu harbiy xizmatchilarga davlatga xiyonat qilish ayblovi qo‘yilishi va ular harbiy tribunalga tortilishi mumkin. Tramp jamoasi buning ehtimolini o‘rganmoqchi.
“Ular (Tramp jamoasi) bu masalaga juda jiddiy yondashmoqda”, deb ta’kidladi NBC telekanali suhbatdoshlaridan biri.
Manbalarning qo‘shimcha qilishicha, ushbu yo‘nalishning kuratorlari orasida Mudofaa vazirining giyohvand moddalar va global tahdidlarga qarshi kurashish bo‘yicha yordamchisining sobiq o‘rinbosari Mett Flinn ham bor. Masalaning huquqiy jihati, ya’ni davlatga xiyonat qilish ayblovi noaniq bo‘lib qolmoqda, chunki Amerika harbiylari AQSHning amaldagi prezidenti Jo Baydenning buyrug‘ini bajargan.
AQSH qo‘shinlarning Afg‘onistondan chiqishi
AQSH 2001-yildagi 11-sentyabr teraktlaridan so‘ng Afg‘onistonga o‘z qo‘shinlarini kiritdi. Ularning maqsadi ushbu hujumlar uchun javobgar bo‘lgan “Al-Qoida” guruhiga qarshi kurashish edi. Missiyani tugatish to‘g‘risidagi birinchi kelishuvni 2020-yilda Tramp imzolagan. Qo‘shinlarning olib chiqilishi bir yil o‘tgach, Bayden davrida amalga oshirildi. Amerikaliklar chiqib ketgandan so‘ng, Afg‘onistonda hokimiyatni “Tolibon” harakati egalladi.
Bayden “Tolibon” hokimiyatini tan olishdan bosh tortdi. AQSH va uning ittifoqchilari Afg‘oniston muvaqqat hukumatidan inson huquqlariga rioya etish va mintaqada terrorchi guruhlarning tarqalishi bilan bog‘liq muammolarni hal etishni talab qilmoqda. So‘nggi yillarda “Tolibon” ayollar uchun cheklovlarni sezilarli darajada kuchaytirdi.
Joriy yil 5-noyabr kuni bo‘lib o‘tgan AQSH prezidentligi saylovida Tramp g‘alaba qozondi. U Amerika qo‘shinlarining Afg‘onistondan olib chiqilishini “tarixdagi eng sharmandali voqea” deb baholadi. Respublikachi nomzod Oq uyga qaytgan taqdirda, “Afg‘onistondagi falokatga aloqador bo‘lgan har bir yuqori martabali harbiy amaldorni” ishdan olishga va’da berdi. “Tolibon” esa, o‘z navbatida, uning g‘alabasini AQSH bilan munosabatlarni “toza varaqdan” boshlash imkoniyati bilan bog‘ladi.
Izoh (0)