“Tolibon” harakati tez orada qizlarning ta’lim olishiga qo‘yilgan taqiq masalasini qayta ko‘rib chiqadi. Bu haqda AQSHning Afg‘onistondagi maxsus vakili Tomas Uestga tayanib, Reuters xabar berdi.
AQSH vakili bu haqda Dohadagi forumda ma’lum qilgan. Uning fikricha, mazkur qaror nafaqat afg‘on ayol-qizlarining ta’lim olish borasidagi huquqlarini buzadi, balki butun Afg‘oniston kelajagini xavf ostiga qo‘yadi.
“O‘tgan chorshanba kuni sodir bo‘lgan o‘zgarishlardan hayratga tushdim. Bu avvalo afg‘on xalqining ishonchiga putur yetkazishdir. O‘ylaymanki, barchasi yo‘qotilmagan. Tez kunlarda ushbu qaror bekor qilinishini ko‘ramiz, degan umiddaman”, — deydi u.
Agentlik ma’lumotlariga ko‘ra, Qo‘shma Shtatlar Dohada toliblar bilan asosiy iqtisodiy masalalar muhokama qilinishi kerak bo‘lgan uchrashuvni qo‘qqisdan bekor qilgan. Ta’kidlanishicha, bu kabi qaror toliblar barcha qizlarni o‘rta maktablarga qaytarish to‘g‘risidagi qarorni bekor qilganidan so‘ng qabul qilingan.
Bundan oldin “Tolibon” vakillari ayollarning erkak hamrohsiz samolyotda uchishini taqiqlagan edi — ular aviakompaniyalarga yangi qoidalar to‘g‘risidagi xatni yuborgan. Gap nafaqat Afg‘oniston ichidagi, balki xorijiy reyslar haqida ham ketmoqda. Manbalarga ko‘ra, toliblar buyrug‘iga muvofiq 25-mart kuni Kobul aeroportida o‘nlab ayollarning qo‘nishiga ruxsat berilmagan. Shu bilan birga, ayollarning bir qismiga Ariana Airlines samolyotiga o‘tirishga ruxsat berilgan, biroq qaror e’lon qilingan vaqtda portning jo‘nash vaqti yaqinlashib qolgan edi.
“Tolibon” mamlakatda yana hokimiyat tepasiga kelgan avgust oyida ayollarga “islom qonunlari doirasida” ishlash, o‘qish va jamiyat boshqaruvida ishtirok etishga ruxsat berilishi aytgan edi. Shu bilan birga, toliblarning shartlariga ko‘ra, Afg‘onistonda ayollarning barchasi hijob (paranji) kiyishi kerak bo‘ladi. “Tolibon” avvalgi boshqaruvi davridan farqli ravishda bu safar ayollarning uydan yolg‘iz, erkaklar hamrohligisiz chiqa olishi mumkinligini kafolatlamoqda.
Keyinchalik Mujohid Afg‘onistondagi ishlaydigan ayollarni o‘z xavfsizligi uchun uydan chiqmaslikka chaqirgandi. “Bizning xavfsizlik kuchlarimizga ayollar bilan qanday munosabatda bo‘lish, ular bilan qanday muloqot qilish haqida o‘rgatilmagan. Mamlakatda to‘liq xavfsizlik o‘rnatilmaguncha ayollardan uyda qolishini so‘raymiz ”, — degan edi harakat vakili.
Fevral oxirida Afg‘onistondagi barcha davlat universitetlari yigit-qizlar uchun qayta ochilgandi. Qayta ochilgan Kobul davlat universiteti talabalarining aytishicha, “Tolibon” talabiga ko‘ra qizlar va yigitlarga alohida-alohida dars o‘tilmoqda. Kunning bir qismida faqat qizlar, boshqa qismida — o‘g‘il bolalar uchun darslar belgilangan.
Izoh (0)