Afg‘on harbiy kuchlari avvalroq Pokiston tomonidan amalga oshirilgan va 46 nafar afg‘on halok bo‘lgan havo zarbasiga javoban Pokistonning bir qator hududlariga hujum qildi.
Aniqlanishicha, ikki mamlakat chegarasidagi janglar 27-dekabr oqshomidan beri davom etmoqda.
Afg‘oniston Mudofaa vazirligiga ko‘ra, afg‘on harbiylari Pokistonning mamlakat hududiga havo hujumlariga javoban “dushman kuchlari va ularning tarafdorlari joylashgan markazlar va boshpanalarga” hujum qilgan.
Ikki davlat orasidagi 2600 kilometrdan ortiq uzunlikdagi chegara 1893-yilgi Dyurand chizig‘i asosida belgilangan bo‘lib, u Afg‘oniston Amirligi va Britaniya Hindistoni o‘rtasidagi chegaralarni belgilash kelishuvi natijasida vujudga kelgan. Afg‘oniston hukumati 1947-yilda Britaniya Hindistoni parchalanib, Pokiston tashkil topganidan so‘ng bu chegarani tan olishni to‘xtatdi. 2021-yildan buyon Afg‘onistonni nazorat qilayotgan “Tolibon” ham bu pozitsiyani qo‘llab-quvvatlamoqda.
Eronning Tasnim agentligi ham 27-dekabr kuni kechqurun Afg‘onistonning Xost va Paktiya provinsiyalari chegara hududlarida “Tolibon” tarafdorlari va Pokiston harbiylari o‘rtasida janglar ketayotganini yozgan.
Pokiston 24-dekabr kuni Afg‘onistonning Paktika viloyati Barmal tumaniga havo hujumi uyushtirgan edi.
Vayronalar ostidan 15 kishi, jumladan, ayollar va bolalar jasadi olib chiqilgan. Manbalarga ko‘ra, Barmal tumanidagi kamida yetti qishloq havo hujumiga uchragan. Laman qishlog‘ida bir oilaning besh a’zosi, jumladan ayollar va bolalar halok bo‘lgan. Qurbonlar soni ortishi mumkin va odamlar vayronalar ostidan jasadlarni olib chiqmoqda.
Mahalliy aholi portlash Pokiston samolyotlari tomonidan amalga oshirilganini aytgan. Aviatexnikalar Xost, Paktiya va Paktika osmonida patrullik qilmoqda.
“Tolibon” javob qaytarishga va’da berdi
“Tolibon” Mudofaa vazirligi Pokistonning Barmal tumanining bir qismiga uyushtirgan havo hujumlarini ochiq tajovuz sifatida qoraladi. Vazirlik hujumlar Pokiston armiyasi tomonidan amalga oshirilganini ta’kidladi.
“Tolibon” bu shafqatsiz harakatni barcha xalqaro tamoyillarga zid va ochiq tajovuz deb hisoblaydi va uni keskin qoralaydi, deydi vazirlikning rasmiy vakili Inoyatulla Xorazmiy.
U hujumda asosan “vaziristonlik qochqinlar”ni nishonga olingani, bir qancha bolalar va boshqa tinch aholi vakillari halok bo‘lgan va yaralanganini aytdi. “Tolibon” hujumni javobsiz qoldirmasliklarini qo‘shimcha qildi.
Al Jazeera’nig ta’kidlashicha, “Tolibon” Afg‘onistonda hokimiyat tepasiga kelgach, “Tahriki Tolibon Pokiston” (TTP) jangarilari Pokiston xavfsizlik kuchlariga chegarada, ayniqsa, Xaybar-Paxtunxva va Balujistonda hujum qilish holatlari ko‘paygan.
Afg‘on toliblari va TTP o‘rtasidagi “simbiotik munosabatlar” yillar davomida davom etib kelgan. Shu sababli, Kobulning Islomobod talabiga ko‘ra TTP a’zolariga qarshi biron-bir chora ko‘rishi ehtimoldan uzoq. Bunday harakat mintaqada “Afg‘onistondagi Islom davlati” kabi boshqa, yanada radikal guruhlarning faollashuviga olib kelishi mumkin.
Izoh (0)