Afg‘onistonning Nangarhor viloyatida “Tolibon” harakati ayollarni erkak yo‘lboshchisiz shifoxonalarga borishini taqiqladi. Bu haqda Hasht-e Subh Daily xabar berdi.
Ma’lum qilinishicha, mazkur buyruq Nangarhor tumanlari aholisiga yetkazilgan. Masjid imom-xatiblariga ushbu buyruqni jamoaviy namozlarda aholiga jiddiy yetkazish va amalga oshirish bo‘yicha topshiriq berilgan. Ezgulikni targ‘ib qilish va illatlarning oldini olish vazirligi “Tolibon”ning ayollarning kasalxonaga borishiga qo‘yilgan cheklov bo‘yicha ma’lumot bermagan.
Ta’kidlanishicha, ushbu taqiq 25-noyabr xalqaro ayollarga nisbatan zo‘ravonlikka barham berish kunida e’lon qilingan.
Noyabr oyida “Tolibon”ayollarga bir qator taqiqlarni joriy qilgandi. Xususan, ayollarga SIM karta sotib olish, istirohat bog‘iga tashrif buyurish taqiqlangan. Yevropa Ittifoqi esa “Tolibon”ning ayollarga nisbatan yangi cheklovlarini qoralagan.
