Томошабинлар кино юлдузларини фақатгина шон-шуҳрат ва миллионлаб долларлик гонорар билан тасаввур қилади. Аммо реал ҳаётда баъзида энг йирик ва муваффақиятли фильмларда рол ўйнаган актёрлар ҳам кутилган даражада кўп ҳақ олмайди. Қуйида жуда катта даромад келтирган фильмларда иштирок этиб, аммо нисбатан кам гонорар олган 5 актёр ҳақида сўз юритилган.
Дэниел Рэдклифф — “Гарри Поттер ва ҳикматлар тоши”
Режиссёр Крис Коламбус учун энг қийин вазифа — Гарри, Рон ва Гермиона ролларига тўғри актёрларни топиш эди. Кастинг жуда узоқ давом этди ва бир пайт Коламбус Гарри Поттер ролига мос актёрни топишга ишончни йўқотди. Шунда у Дэниэл Редклиффни топган ва унинг ота-онасининг рад жавобидан сўнг, энг яхши актёрни топа олмаслигини англаган. Бироқ омад Крис томонда бўлди ва Редклиффнинг ота-онаси охир-оқибат ўғли “Гарри Поттер”да рол ўйнашга рухсат берди.
Фильм бюджети 125 миллион доллар бўлган ва 1 миллиард доллар даромад келтирган бўлса-да, Дэниэл фақат 1 миллион доллар олган. Кейинги фильмда гонорари 2 миллионга кўтарилган, аммо бу ҳам асосий рол учун жуда кам эди. Шунга қарамай, Дэниэл, Эмма Уотсон ва Руперт Гринт ўша пайтда энг кўп ҳақ олган британиялик ёш актёрлар бўлган.
Жейми Дорнан — “Кулрангнинг 50 туси”
Жейми Дорнан “Бир замонлар эртакда” сериалидаги иккинчи даражали роли орқали озгина машҳурликка эришган, кенг эътирофга эса “Қулаш” сериали орқали сазовор бўлган. Ана шу кичик, бироқ етарлича жиддий тажриба билан у “Кулрангнинг 50 туси” фильмига кириб келди. Жейми бу фильм ҳақида ҳеч қачон илиқ фикр билдирмаган, чунки у бош қаҳрамон образини ёқимсиз ва ўз шахсиятига мутлақо зид деб ҳисоблаган.
Фильм бюджети 40 миллион доллар бўлган, Жеймининг гонорари эса атиги 100 минг доллар деб белгиланган. Айнан шу гонорар уни кейинги қисмларда қолишга ундаган ягона сабаб бўлган. Агар тўлов миқдори ўзгармаганида, Дорнан лойиҳани тарк этган бўларди — ахир у машҳурликни аллақачон қўлга киритган ва бошқа таклифларни кўриб чиқиши мумкин эди. Бироқ студия уни қўлдан чиқаришни истамади ва гонорарини сезиларли даражада оширди. Натижада Жейми кейинги икки фильм учун жами 10 миллион доллардан ортиқ даромад олди.
Жон Траволта — “Жиноят ҳақидаги ҳикоя”
“Жиноят ҳақидаги ҳикоя” фильмигача Жон Траволта аллақачон машҳур актёр эди, бироқ у карьераси қулаб бораётган паллада бўлган. Илгари оммабоп ва талабгир бўлган актёрни бирданига танқидчилар нишонга олди. У нафақат омадсиз фильмларда, балки ҳит бўлган картиналарда ҳам муваффақиятсиз роллар ижро этган. Ҳеч нарса ёрдам бермагач, Траволта янги ролларни танлашда анча эҳтиёткор бўла бошлади ва бир сафар ҳаттоки “Forrest Gamp” фильмидаги бош ролни рад этди.
Буни танлов деб бўладими? Маълум маънода — ҳа, чунки у айнан шу фильм билан “Жиноят ҳақидаги ҳикоя” орасида танлов қилган ва натижада Квентин Тарантино картинасини танлаган. Тўғриси, у бу фильмни паст бюджетли ва кичик аудиторияга мўлжалланган “Телбаларча итлар” услубидаги лойиҳа деб ўйлаган. Шу сабабдан Траволта атиги 150 минг доллар гонорарга рози бўлган. Аммо охир-оқибат у бу фильм орқали анча катта ютуққа эришди — бу гал унинг даромади пулда эмас, балки машҳурликда ўлчанди. “Жиноят ҳақидаги ҳикоя” туфайли Жон Траволта яна шон-шуҳрат чўққисига қайтди.
Жон Ҳилл — “Уолл-стрит бўриси”
Жон Ҳилл — фақат пул учун рол танлайдиган актёр эмас. Афтидан, у ўзи учун етарли даражада маблағ топган ва энди рол танлашда кўпроқ образ ва лойиҳа моҳиятига эътибор беради. Агар бирор нарса унга маъқул келмаса, энг истиқболли лойиҳалардан ҳам воз кечиши мумкин. Масалан, Жон Ҳилл режиссёр Метт Ривзнинг “Бетмен” фильмида рол ўйнаши керак эди, бироқ якунда бу ролга Колин Фаррелл танланди.
Жоннинг нима сабабдан фильмда иштирок этмагани аниқ эмас. Айримлар унинг Пингуин эмас, Загадкачини ўйнашни истаганини айтади. Бошқалар эса унга Пингуин образи ёқмаганини, у бу персонажни ўзгартиришни хоҳлаганини таъкидлайди. Яна бир фикрга кўра, масала гонорарда бўлган: Жон 10 миллион доллар сўраган, бу эса Роберт Паттинсон олган 5 миллион доллардан ҳам юқори бўлган. Эҳтимол, бу уч сабабнинг барчаси биргаликда рол танловига таъсир қилган.
Аммо аниқ бир нарса бор: бир неча йил аввал Жон катта гонорардан воз кечиб, фақат Мартин Скорсезе билан ишлаш учун рози бўлган. “Уолл-стрит бўриси” фильми учун у SAG (Screen Actors Guild) белгилаган энг минимал ҳақ — 60 минг доллар олган. Таққослаш учун, Леонардо Ди Каприо айнан шу фильм учун 10 миллион доллар ишлаб топган, гарчи улар экранда деярли доимо бирга кўриниш берган бўлса ҳам.
Жон Кенди — “Уйда ёлғиз”
Жон — профессионал ва жуда машҳур комик, у “Уйда ёлғиз”нинг биринчи қисмида кичик ролни ижро этган. Фильмнинг бюджети атиги 15-18 миллион долларни ташкил қилган, чунки студия фильмнинг катта муваффақиятга эришишига ишонмаган ва ҳамма уни оддий болалар комедияси сифатида кўрган. Режиссёр Крис Коламбус студиядан имкон қадар кўпроқ пул олишга ҳаракат қилган, студия эса, ўз навбатида, ҳамма нарсада тежашни хоҳлаган, жумладан актёрларнинг гонорарларини ҳам.
Жон Кенди ўз роли учун атиги 414 доллар олган. Ҳатто суратга олиш жараёнида Жон буни аччиқланиб айтган бўлса-да, барибир ролини жуда яхши ижро этган. Крис Коламбуснинг сўзларига кўра, унинг персонажининг деярли барча репликалари — бу импровизация эди. Кенди фильмнинг деярли ярим миллиард доллар даромад келтирганини билиб, ҳайратда қолди. Жон студиядан компенсация талаб қилган, аммо бу иш қандай тугаганлиги ҳали ҳам номаълум, чунки Жон фильмнинг чиқарилишидан 4 йил ўтиб вафот этди.
Изоҳ (0)