“Гарри Поттер” юлдузи оиланинг ягона фарзанди. Унинг ота-онаси Алан ва Марсия ҳам ёшликларида актёрлик соҳасида ўзларини синаб кўрган. Бироқ сезиларли муваффақиятга эриша олишмагач, отаси адабий агент, онаси эса кастинг директори сифатида ишлайди.
Дэниэл ҳам ёшлигиданоқ актёрликни орзу қиларди. “Мен 5 ёшда эдим. Онамга қараб: “Ойи, мен актёр бўлмоқчиман, деганман, дейди Редклифф.
Бўлажак юлдузнинг ота-онаси ягона фарзандларининг бундай танловидан мамнун эмасди. Иккаласи ҳам шоу-бизнес ва кино оламида унчалик ижобий тажрибага эга бўлмаганлари учун, табиийки, Дэниэлнинг худди шу йўлдан бориб, ўша қийинчиликларга дуч келишини истамасдилар.
Аммо Дэниэл улғайгач, унга кастингда қатнашишга рухсат беришди. Бунда улар муваффақиятдан кўра, ўғиллари ҳақиқий кино жараёни ва актёрлик касбининг барча салбий томонларига дуч келгач, иштиёқи сўнишига умид қилишганди.
Аммо тажриба жуда муваффақиятли бўлади. Дэниэл 10 ёшида BBC Оне телеканалининг икки қисмли “Девид Копперфилд” фильмида экрандаги илк қадамини қўйди. Кейинги йили эса унга ҳаётини бутунлай ўзгартириб юборадиган рол таклиф этилади. Бироқ ота-онаси бу ролни дарҳол рад этишади ва продюсерлар уларни узоқ вақт давомида кўндиришга ҳамда муросага келишга мажбур бўлишади.
“Гарри Поттер” фильми продюсери Девид Хеймен ва сценарий муаллифи Стив Кловз Дэниэлни биринчи марта 2000 йилда Лондон театрида кўрган. Бола саҳнада эмас, балки томошабинлар орасида эди, лекин шунга қарамай, дарҳол эътиборни ўзига тортади.
“Орқамда катта-катта мовий кўзли бола ўтирарди. Бу Ден Редклифф эди. Биринчи таассуротларим ҳали-ҳануз ёдимда... У қизиқувчан, ҳазилкаш ва ғайратли эди. У жуда самимий ва ёқимтой эди”, дея ҳикоя қилади Хеймен 2009 йилда Los Angeles Times журналисти Жефф Бушга.
Ўша пайтга келиб, “Гарри Поттер” ижодкорлари 7 ойдан бери бош ролга актёр излаб юрган эдилар.
Редклиффни кастингга таклиф қилишади, бироқ ёш актёрнинг ота-онаси уни юборишни истамайди. Аслида ўша пайтда суратга олиш ишлари Буюк Британияда эмас, балки АҚШда ўтказилиши режалаштирилгани учун Алан ва Марсия продюсерларга бундай кескин ўзгаришлар боланинг ҳаётига салбий таъсир кўрсатишини айтган. Редклиффнинг ота-онаси кичкина ўғлининг 6 ой давомида уйдан узоқда суратга тушишидан мамнун эмасди ва суратга олиш ишлари Лос-Анжелесда бўлиб ўтишидан хавотирлари борлигини рўкач қилиб, таклифни рад этишади.
Бироқ продюсерлар ҳам бўш келишмайди, ота-онасини кўндиришга ҳаракат қилишади. Бир неча ой ўтгач, суратга олиш ишлари Буюк Британияда бўлиб ўтиши ва ёш актёрларнинг океан ортига учишига ҳожат қолмаслиги маълум бўлади. Якунда Алан ва Марсия кастингга розилик беришади.
Менимча, ўша пайтда мактабда ҳақиқатан ҳам яхши ўқимаганимни ҳисобга олиб, ота онам: “Балки унга кастингдан ўтишга рухсат бериш керакдир”, деб ўйлашди. Ҳаммаси шундан бошланди, деб эслайди кейинчалик Редклифф.
Дэниэлнинг номзоди бўйича қарор бир овоздан қабул қилинади. Режиссёр Крис Коламбус ва Жоан Роулинг ҳам бундан яхшироқ Гаррини топа олмасликларига амин эдилар.
Дарвоқе, Редклиффни рози қилиш учун Warner Брос. студияси яна бир ён беришга мажбур бўлади ва унга бир вақтнинг ўзида иккита фильм учун шартнома таклиф қилади. Албатта, охир-оқибат бу 8 та ақл бовар қилмайдиган муваффақиятли фильмни ўз ичига олган шартномага айланади.
Биринчи фильмдан сўнг бу ролда нафақат бошқа Гаррини, балки бошқа Гермиона ва Ронни ҳам тасаввур қилиб бўлмасди. Дэниэл эса сўнгги фильм учун 26,5 миллион доллар миқдорида катта гонорар олиб, поп-маданият тарихида муносиб ўрин эгаллади.
Изоҳ (0)