Совет ва рус актёри, режиссёр ва ссенарист Дмитрий Иосифов томошабинларнинг хотирасида абадий “Буратино саргузаштлари” (1975) номли машҳур телесериалдаги Буратино роли билан муҳрланиб қолди. Болалигида ёғочдан ясалган бола образини гавдалантирган Иосифов дарҳол экран юлдузига айланди: позитив, шўх ва кўзларида шижоат ва нур билан танилган ёш Дмитрий миллионлаб одамларнинг болалик хотираларида қолди.
Буратино роли Дмитрий учун дебют бўлган. Лекин унинг ёши суратга олиш майдончасидаги мураккаб вазифаларни бажаришига халақит бермаган. У камера қаршисида ўзини эркин ва кўп йиллик тажрибага эгадек тутган.
Мазкур лойиҳа туфайли Иосифов фақат машҳурликка эришди, балки жуда яхши даромад ҳам кўрди. Атиги 9 ёшида у ҳаттоки катталар орзу қилолмайдиган даражадаги катта пулларни ишлаб олган.
“Леня Нечаев (фильм режиссёри) мен учун шахсий гонорар ставкасини тузиб берган эди, ўша пайтда актёр болалар орасида мен энг юқори маоши — ойига 100 рубль миқдорда гонорар олганман. Суратга тушиш ишлари учун 600 рубль олдим, сўнг яна худди шунча миқдорда пулни саҳналаштириш ишлари учун тўлашди. Умумий ҳисобда мен 1 минг 200 рубль пул ишлаб олдим”, деб эслайди Иосифов.
Таққослаш учун: 1970 йиллар ўрталарида СССРда ўртача ойлик миқдори 150 рубль эди.
“Буратино саргузаштлари” намойиш этилганидан кейин Иосифов жуда ҳам машҳур бўлиб кетган ва режиссёрлардан турли таклифлар келиб туша бошлаган. 1977 йилда “Қизил қалпоқча ҳақида”, 1981 йилда “Сотилган кулги”, 1987 йилда “Ошиқ бўёқчи ҳақида ҳикоя” ва бошқа кўплаб фильмларда рол ўйнаган.
Изоҳ (0)