Режиссёрлар фильм муваффақияти учун актёрларга жуда кўп пул тикади. Айниқса, асар Голливуднинг энг кассабоп фильмларидан бирига айланишида актёрлар ижро этган роли муҳим аҳамиятга эга. Баъзи юлдузлар шунчалик катта миқдорда гонорар оладики, уларнинг маоши фильм бюджетининг ярмини ташкил қилади.
Брюс Уиллис — “Олтинчи туйғу”
Сўнгги йилларда афазиядан азият чекаётган Брюс Уиллис яхши гонорар учун мутлақо ҳар қандай ролни ўйнашга мажбур бўлган. Шундай қилиб, Брюс ҳақиқий классикада рол ўйнаган машҳур актёрдан сифатсиз жангари фильмларнинг юлдузига айланди. Бироқ шундай вақтлар бўлдики, Брюснинг битта фильми унинг бошқа ўнта асарининг ўрнини босган.
Уиллис Малколм Кроу исмли психолог ролини ўйнаган “Олтинчи туйғу” фильми учун унга 14 миллион доллар таклиф қилишади. Фильм бюджети 40 миллионни ташкил қилган. Бироқ Брюс гонорарини кинотеатрлар ва DVD тўловларининг 17 фоизига алмаштиришни таклиф қилади. Натижада “Олтинчи туйғу” 672 миллион даромад кўради, актёр эса камида 114 миллион доллар ишлаб олади.
Киану Ривз — “Матрица: қайта ишга тушириш” ва “Матрица: инқилоб”
Актёр Киану Ривз ушбу фильмда ўз мақсадини аниқ биладиган ва ўзига ишончи баланд қаҳрамонни ижро этган. Унинг жангини томоша қилиш мухлисларга ҳақиқий завқ беради. Актёр аввалида фильм учун 15 миллион доллар гонорарга рози бўлган, бироқ унинг агенти фильм кассасининг 15 фоизини олишни таклиф этган ва актёр бунга рози бўлган. Юқори натижаларни кўрсатган “Матрица”нинг учинчи қисми Киануга 126 миллион доллар даромад олиб келди ва шу тариқа у 2003 йилнинг энг кўп даромад олган актёрларидан бирига айланди.
Шундай бўлса-да, Киану Ривз юлдузлик касаллигига чалинмаган саноқли актёрлардан бири саналади. Хайрли ишларни ҳам яхши кўрувчи Киану 80 миллион доллар гонорарини фильм дизайнерлари ҳамда махсус эффектлари учун масъул бўлган жамоага тарқатиб юборган. 12 нафар каскадёрга эса янги мототцикл совға қилган.
Том Круз — “Дунёлар жанги”
Актёр Том Круз иштирок этган энг яхши фильмлардан бирига айланган “Дунёлар жанги” режиссёр Стивен Спилберг томонидан суратга олинган. Асар Герберт Уэллс романи асосида яратилган. Фильмни суратга олиш ишлари бир неча ой давом этган ва Том каскадёрлар ёрдамисиз барча мураккаб ҳаракатларни мустақил бажарган. Фильм учун Том Круз 100 миллион доллар гонорар олган. Бу касса тушумларининг 20 фоизини ташкил этади.
Сем Уортингтон — “Аватар: сув йўли”
Сем Уортингтонни “Аватар” фильмидаги бош ролга тасдиқлашдан олдин режиссёр Жеймс Кемерон бу ролни Метт Деймонга таклиф қилади, аммо Метт рад этади, чунки у навбатдаги “Борн” фильмининг суратга олиш ишлари билан банд эди. Кейинчалик актёр бу ролни рад этганидан афсусда эканлигини тан олади, чунки Кемерон унга барча даромадларнинг 10 фоизини таклиф қилган, бундай ҳолда унинг гонорари деярли 300 миллион долларга етарди, бу Киану Ривзникидан анча кўп. Қизиғи шундаки, Жеймс Кемерон Сем Уортингтонга Деймонга таклиф қилган шартларни қўймайди.
Аммо актёр бир неча йил ўтгач, “Аватар”нинг иккинчи фильми учун шартнома имзолагандан сўнг унга қатъий белгиланган 10 миллион доллар ва йиғимнинг 5 фоизи таклиф қилинади. Гарчи “Аватар: сув йўли” биринчи фильмдан камроқ даромад келтирган бўлса-да, бу Уортингтоннинг 110 миллиондан ортиқ даромад топиши учун етарли эди.
Уилл Смит — “Қора либос кийган одамлар-3”
Актёр Уилл Смит фильмнинг учинчи қисмида ҳам барчага таниш бўлган Жей ролини ижро этди. Унинг қаҳрамони аввалгидек ажойиб ва позитив характерли шахс сифатида тасвирлангани боис Уилл мухлисларини янада шод этди.
Актёр фильмдаги роли учун 18 миллион долларлик шартнома имзолаган ҳамда касса тушумларининг 15 фоизини олишни режалаштирган эди. Фильм 624 миллион доллар даромадга чиққанда Смит 100 миллион доллардан кўпроқ маош олишга эришди ва у тарихдаги энг кўп даромад оладиган актёрлардан бирига айланди.
Изоҳ (0)