Голливуд орзулар ушаладиган ва мақсадлар рўёбга чиқадиган маскандир. Аммо энг ёрқин юлдузлар қаторидан жой олиш барчага бирдек насиб этмайди. Қуйида мақсади йўлида кўплаб қийинчиликларни енгиб, муваффақият чўққисига ўз кучи билан кўтарилган ва ҳозирда Голливуднинг энг катта гонорар оладиган актёрларини кўриб чиқамиз.
Адам Сендлер
Forbes журналига кўра, “Олтин глобус” ва “Эмми” мукофотига номзод Адам Сендлер Голливуддаги энг кўп маош олувчи актёрга айланди. Актёр ўтган йили 73 миллион доллар ишлаб топди. Комедия фильмлари қироли гонорарнинг катта қисмини Netflix билан ҳамкорлик шартномаси ва стенд-тур концертлари орқали ишлади. Ушбу пул миқдори ҳақида тасаввурга эга бўлиш учун йилига 50 минг доллар сарфлашни тасаввур қилиб кўринг. Бундай ҳолда, 73 миллион доллар 1460 йил давомида сарфлаш учун етарли бўлади. Демак, Сендлер бир неча авлоди учун етадиган даражада маблағ тўплаган, дея олиш мумкин. Унинг “Катта дада” ва “Бахтли Гилмор” каби фильмлари классикага айланиб, бутун дунё томошабинларини хурсанд қилишда давом этмоқда.
Марго Робби
Сўнгги йилда трендга айланган “Барби” фильмининг бош қаҳрамони, австралиялик юлдуз Марго Робби 2023 йилнинг энг кўп ҳақ тўланган актрисаси бўлди. У энг кўп гонорар оладиган Голливуд юлдузлари бешлигида иккинчи ўринни эгаллади. Тўрт карра “Олтин глобус”га, олти марта BAFTA мукофотига лойиқ кўрилган, “Оскар”га уч карра номзод бўлган актрисанинг умумий даромади 59 миллион долларни ташкил қилди.
Марго Роббининг даромади “Барби”, “Астероидлар шаҳри” ва “Солтбурн” фильмига продюсерлик қилишдан олган фойдасига асосланган.
Том Круз
Том Круз Голливуднинг тирик афсонаси ҳисобланади У ўзининг ажойиб трюклари ва актёрлик маҳорати билан томошабинларни ҳайратда қолдиришда давом этмоқда. Круз ўтган йили 45 миллион доллар ишлаб топди ва тўрт карра “Оскар”га номзод, учта “Олтин глобус” совриндори ҳамда Канн кинофестивалининг фахрий “Палма новдаси” соҳиби бўлди.
62 ёшли актёр учун пулнинг асосий қисми “Уддалаб бўлмас топшириқ-7” фильмидан тушган. Бюджети 291 миллион доллар бўлган фильм Круз карьерасидаги ва Paramount компанияси тарихидаги энг қиммат картинага айланган.
Райан Гослинг
Дунёдаги энг ёқимтой эркаклардан бири дея тан олинган актёр Райан Гослинг бир қанча йирик лойиҳаларда, жумладан, “Барби” фильмида Кен роли орқали йиллик даромади 50 миллион долларга етди.
Метт Деймон
Метт Деймоннинг ҳам йиллик даромади катта миқдорни ташкил қилади. Актёр ҳозирда замонамизнинг энг кўп маош оладиган актёрларнинг кучли бешталигида турибди. Ўтган йилда Деймон “Оппенгеймер” ҳамда “Борннинг қайтиши” фильмлари орқали 25 миллион доллар даромад кўрди.
Умуман олганда, юқорида исмлари тилга олинган барча актёрлар ўз истеъдоди, меҳнатсеварлиги ва қатъияти туфайли шуҳрат ва бойлик чўққиларини забт эта олдилар. Улар ўз устида ишлаш ва тинимсиз меҳнат қилиш орқали муваффақиятга эришиш мумкинлигини амалда исботлаб берди.
Изоҳ (0)