16 май куни Тошкентдаги IT Park ҳудудида GameFest 2025 халқаро фестивалига старт берилди. Ўйин ва анимация ихлосмандлари учун мўлжалланган йирик тадбир 17 май куни ҳам давом этади.
Фестивал Ўзбекистон Республикаси Рақамли технологиялар вазирлиги ва Uzbekistan Creative Association (UzCA) томонидан ташкил этилди. Тадбирда ўйин ишлаб чиқувчилар, аниматорлар, стартапчилар, инвесторлар ва халқаро академиялар ҳамда студиялар вакиллари иштирок этди.
Фестивалнинг биринчи кунида йирик компаниялар вакиллари иштирок этган чиқишлар, панел муҳокамалар, инвестиция сессиялари ўрин олди.
Форумда “Марказий Осиёда ўйин студиясини қандай ташкил қилиш ва уни глобал бозорга қандай олиб чиқиш мумкин?” мавзуси кенг муҳокама қилинди. Шунингдек, тадбирда маҳаллий ва халқаро студиялар томонидан лойиҳалар тақдимоти ўтказилди.
Game Forum’да биз чет эллик компания вакилларини чақириб, ўзларининг тажрибасини улашиш, фикрини билдириш ва инвестиция киритишлари учун таклиф қилганмиз. Америка, Хитой ва Европа давлатларидан спикерлар келган. Улар Ўзбекистондаги студияларни кўради ва маъқул бўлганига инвестиция киритади. Кўргазма иштирокчилари хориждан келган инвесторларга ўз лойиҳаларини намойиш қилмоқда. Бу маҳаллий ижод намуналаримизни дунёга танитишда бир қадам бўлади, дейди IT ва инвестициялар маркази менежери.
Ҳозирги кунда ёшлар орасида компьютер ва мобил ўйинларга бўлган қизиқиш кескин ошмоқда. Айрим ҳолларда бу қизиқиш ҳаддан зиёд бўлиб, салбий оқибатларга олиб келиши мумкин. Ўйинлар тўғри йўналтирилса, улар жуда катта фойда келтириши мумкин. Масалан, креатив фикрлаш, стратегик режалаштириш, инглиз тилини ўрганиш ва ҳатто дастурлаш бўйича кўникмаларни ривожлантиришга хизмат қилади.
Кўргазмада иштирок этган Покиза Нурмаматова ўз фикрлари билан ўртоқлашди.
Бундай фестивалда илк бор қатнашишим. Бу эса жуда ҳаяжонли. Биз миллий ўйинларимизни бутун дунёга намойиш этмоқчимиз. Мобил ўйинимиз “Кўпкари” деб номланган. Ҳозирги кундаги ўйинларда кундан-кунга агрессивлик кучайиб бормоқда. Биз эса ўз ўйинимиз орқали миллийликни тарғиб қилмоқчимиз. Ушбу ўйиннинг пулли ва бепул версияси бўлади. Инвесторлар бизнинг ўйинга катта қизиқиш билдирди, дейди у.
Ташкилотчиларнинг таъкидлашича, бу каби тадбирлар нафақат маданий аҳамиятга эга, балки мамлакатимизнинг рақамли креатив соҳадаги глобал мавқейини мустаҳкамлашга хизмат қилади. Томошабинлар замонавий анимация ишланмалари, фильм учун концепт-арт яратиш жараёнлари ва турли хил анимацион фильм ва ўйинлар лойиҳалари билан танишди.
Биз айнан GameFest 2025 фестивалида қатнашиш учун Қозоғистондан келдик. Анимацион студиямизни очилганига 7 йил бўлди. Айнан шу соҳа бўйича Америка билан ҳамкорлигимиз бор. Анимацияларимиз 3 ёш атрофида бўлган болалар учун мўлжалланган. Болалар бу анимациялар орқали ота-онага ҳурмат, миллий қадриятлар ва бошқа ибратли ғояларни ўзлаштиради, дейди қозоғистонлик иштирокчи.
Ўйинлар ва анимациялар яратиш мураккаб, аммо айни пайтда жуда қизиқарли жараён бўлиб, ёшлар орасида катта қизиқиш уйғотмоқда.
Параллел тарзда ишлаган Games&Animation Expo кўргазмасида ташриф буюрувчилар энг янги видео ўйинлар, АР/VR лойиҳаларини синаб кўришди ҳамда маҳаллий ва хорижий анимацион студиялар иш фаолияти билан танишди. Digital Garden зонаси эса инновациялар ва креатив ҳамкорлик марказига айланди.
Фестивалнинг иккинчи куни эса анимация ва визуал эффектлар мавзусига бағишланади. Анимацион форум доирасида етакчи рассомлар, режиссёрлар ва продюсерлар тўпланади. Меҳмонлар орасида Walt Disney Animation Studios, Lucasfilm, Европа анимацион фильмлар ассоциацияси ва бошқа машҳур студиялар мутахассислари иштирок этади.
GameFest 2025 бу — шунчаки фестивал эмас, балки Ўзбекистонда рақамли креатив ва технологик салоҳиятни уйғунлаштирган, барқарор экотизим барпо этишга қаратилган муҳим ташаббусдир.
Изоҳ (0)